Cardiff MS. 1.363 (Hafod 2) – page 52v
Brut y Brenhinoedd
52v
hep kam ryỽygỽ kymell sswllt a treth·eỽ ar+
nam. o|r lle ar ry kynnhalyassam ny eyryoet yn
ryd dytreth hedvch hyt hynn. Ac nyt di·gaỽn g+
anthỽnt hynny namyn keyssyaỽ gwaret yn ry+
dit. a mynnỽ gossot tragywydaỽl keythi·wet
kewylyd ytti. Wlkessar yd wyt yn|y keyssyaỽ ka+
nys kyffredyn gwythen bonhed yssyd yr brytanyeyt
ac yr rỽueynwyr yn llythraỽ y gan eneas ar ỽn ryw
kadwyn yn rac eglỽraỽ kadarn kytemdeythas a|dy+
ley yr·rygthỽnt. honno a dylyỽt y cheyssyaỽ a|e er+
chy ynny. nyt kymhell keythywet arnam. kanys
yr rydyt honno. a ordyfnassam ny ac a dyscassam
ny yr rody a|e chynhal. yn wuy noc arweyn Gwed ke+
ythywet. yn|y|ỽeynt honno y gordyfnassam ni y cha+
ffael a|e medỽ hyt na wdam ni. ỽfydhaỽ y keithwet.
A honno hagen pei. keyssynt y dwyweỽ y dwyn y
kenhym. ny a lawuryem yn y ỽeynt y gallem oc
yn holl nerth o|y hatael yn eỽ herbyn. Ac|wrth hy+
nny Wlkessar byt etnebededyc y|th dy·osparth
ty yn bot ny yn paraỽt y ymlad y|th erbyn ty
o cheyssy ty dyỽot yr ynys honn megys yd w+
uyt yn gogyỽadaỽ dyỽot ydy.
| « p 52r | p 53r » |