Oxford Jesus College MS. 119 (The Book of the Anchorite of Llanddewi Brefi) – page 72v
Marwolaeth Mair
72v
Coffa yr arglỽyd vrenhin gogonet dy enỽ a|uo
moladỽy ygyt ar|tat ar|ysbryt glan yn pres+
sỽylaỽ yn vn teilygdaỽt. Mi a|th|ỽediaf yny
warandeỽych di llef dy laỽ·vorỽyn val na
del ymherbyn neb ryỽ veddyant diaỽl. Ac
na welỽyf ysprydoed y|tyỽyllỽch yn dygyver+
bynnyeit ym. Ac na welỽyf tyỽyssaỽc y|tyỽ+
yllỽch. ar arglỽyd a|dyỽat yn atteb idi. pann
yttoedỽn. i. yn|diodef poeneu anghev chỽerỽ
dros vyỽyt yr holl vyt. ef a|doeth attaf|i tyỽ+
yssaỽc y|tyỽyllỽc. A gỽedy na chauas ynof ol
dim o|e weithret ef. ymeith yd aeth yn orchy+
vygedic sathredic. Ac vrth hynny ti a|e gỽely
ef o gyffredin gyureith genedyl trỽy yr honn
y|daỽ aghev ytt. Ac ny|dichaỽn ef eissoes ar+
gyỽedu ytt kannys mi a|vydaf y|th ganhorthỽy+
aỽ. Ac vrth hynny dos y|th wely a|chỽpplaa dy
dylyedus teruyn dy uuched. herỽyd kyureith
adaf. Ac vrth hynny vygỽerthvaỽrussaf em+
dyret yn dibryder. dabre vyg|kyfnessaf y eisted+
ua buched dragyỽyd. kannys yd ym y|th|aros
milỽryaeth nefaỽl vrth dy|arỽein y leỽenyd pa+
radỽys. Ar arglỽyd yn dyỽedut hynny. go+
gỽydaỽ ar|y gỽely a|oruc. a|diolỽch yr arglỽyd.
Ac anuon y|hyspryt. Ac yna y|gỽelei yr ebestyl
| « p 72r | p 73r » |