Oxford Jesus College MS. 57 – page 10
Llyfr Blegywryd
10
ystaueỻ y brenhin. Naỽd gỽastraỽu* afỽyn
yỽ. tra wnel y gof ỻys pedeir pedol. ac eu
to o hoelyon. a thra bedolo amỽs y brenhin.
Naỽd y kanhỽyỻyd yỽ; o|r pan ennynher y
gannỽyỻ gyntaf hyt pan|diffoder y diwethaf.
Naỽd y truỻyat yỽ. o|r pan dechreuer gỽaỻaỽ
y gerỽyn gyntaf. hyt pan waỻawer y diweth+
af Naỽd y medyd yỽ. o|r pan dechreuo para+
toi y gerỽyn ved yny darffo y chudyaỽ. Na+
ỽd sỽydỽr ỻys yỽ. o|r pan dechreuo rannu y
bỽyt yny gaffo y diwethaf y vỽyt. Naỽd y
coc yỽ. o|r pan|dechreuo troi y golỽyth kyntaf
hyt pan dotter y diwethaf geyr bronn y bren+
hin a|r vrenhines. Naỽd y troedaỽc yỽ; o|r
pan dechreuo eisted dan draet y brenhin hyt
pan el o|e ystaueỻ. Naỽd y medyc yỽ. o|r pan
el o|e ystaueỻ o arch y brenhin y ovỽy claf
yny del y|r ỻys drachevyn. Naỽd gỽastraỽt
brenhines yỽ. kyffelyb y naỽd gỽastraỽt bren+
hin. Naỽd y kynudỽr yỽ. hyt y ỻe peỻaf yd
| « p 9 | p 11 » |