Oxford Jesus College MS. 57 – page 94
Llyfr Blegywryd
94
heb achaỽs aduỽyn. camlyryus uyd. Y rei kyn+
drychaỽl hagen barnent y dadyl neu dyngent
na|s|gỽdant rac coỻi camlyryeu. ac yn|yr eil oet
yn|y dryded lys barnent y dadyl heb neb·ryỽ
esgus. neu y brenhin a|gymero elchỽyl. ac a
gynhalyo gauel paỽb o·honunt ˄hyt pan uarnont
y|dadyl honno a|e|theruynu yn gỽbyl. Nyt oes
amgen boen na dial onyt kymeỻ trỽy gyfre+
ith am wassanaeth diffyc neu dylyet neu rent
y|r brenhin. ony wedir yn|y erbyn. dyeithyr gỽ+
assanaeth a|diffyckyo. ac ny aỻir y enniỻ. Ny
dylyir rydhau gauel a|gymerer dros vn o|r
tri diffyc hynny yny wneler kỽbyl drosti.
K Yt bo ỻiaỽs un vreint o vrodyr o vreint
tir yn|yr vn vraỽt. vn eissoes a varn.
nyt amgen y neb a|e barno yn|y ỻys rỽng y
kynhennỽyr trỽy gyfundeb gỽyr y ỻys. a|r
rei ereiỻ a|vydant gynghorwyr idaỽ yn|y
vraỽt. ac o|r|dygỽyd ef yng|gwerth y dauaỽt
o achaỽs y varn gyffredin a|datkanaỽd ef
| « p 93 | p 95 » |