NLW MS. Llanstephan 27 (The Red Book of Talgarth) – page 101v
Mabinogi Iesu Grist
101v
pỽy oed iessu. O dinas capharnaỽm ỽynt a|doethant hyt
yn|dinas bethleem. Ac yna y doeth meir a Joseph a Jessu.
hyt yn|ty Joseph a|oed yn|y dinas hỽnnỽ a|e bressỽylua. ac
y|r ty y doethant y myỽn. a|dyd·gỽeith y gelwis Joseph y mab
hynaf idaỽ attaỽ. Jago oed y enỽ. ac yd erchis idaỽ uynet
y|r ard y gynnuỻ kaỽl y wneuth* bressych. a Jessu a|aeth y+
gyt ac ef heb wybot y veir a Joseph. A thra yttoed iago yn
kynnuỻ y kaỽl. neidyr a|e brathaỽd yn|y laỽ deheu. ac rac
diruaỽr dolur dodi ỻef a|oruc. a phan yttoed yn dyffygyaỽ
o chwerỽder ymadraỽd y dywaỽt. gỽae vi gỽae ui y neidyr
waethaf a|m brathaỽd y|m ỻaỽ. Jessu a oed ar y ỻaỽ araỻ i+
daỽ yn sefyỻ pan gigleu ef Jago yn|ỻefein y redaỽd tu ac
attaỽ. ac y kymerth y laỽ yn|y laỽ ynteu. ac ny|wnaeth dim
namyn chỽythu ar y laỽ. ac yn diannot y Jachaaỽd y laỽ.
ac y bu uarỽ y sarff hỽnnỽ. a meir a Joseph a ryuedassant
pa|beth oed hynny. ac y menegis iessu udunt. ~ ~ ~
Pan yttoed yn harglỽyd ni Jessu grist yn dengmlỽyd ar
hugeint. Yna y dechreuaỽd ef pregethu a|gỽneuthur gỽyr+
theu. a|throssi ỻawer o sarassinyeit ac amryuael bobloed
oc eu kyfeilyorn y fyd gatholic. a|christonogaeth. ac am
hynny kynghoruynt a|wnaeth y creuloneon Jdewon. a
chymryt kynghor pa vod y geỻynt wneuthur y vrat
a|e lad. Megys y tystolyaetha matheus euengylyỽr yn|y
groclith. Ac yn|y mod hỽnn y traetha. megys y
mae dywedadỽy rac ỻaỽ. ~ ~ ~
| « p 101r | p 102r » |