NLW MS. 3035 (Mostyn 116) – page 64r
Brut y Brenhinoedd
64r
gỽerescẏn freinc ac amlau ohonaỽ y lu. kychwyn a
oruc ar y|mor a gỽynt yn|y ol A dyuot y norhamtỽn
y|r tir A|phan genhataỽyt hyny y|r brenhin diruaỽr
ofyn a aeth arnaỽ o tebygu y mae y elynyon oedynt
yn dyuot y werescẏn y gyfoeth. A galỽ attaỽ kẏnan
meiradaỽc y|nei Ac erchi idaỽ kynuỻaỽ hoỻ ymlad+
wyr y teyrnas a mynet yn eu herbẏn. Ac yn yd oed
gynuỻedic ỻu diruaỽr y veint. kychwyn a oruc ky+
nan meiradaỽc parth a|norhamtỽn yn|y ỻe yd oed
pebyỻeu Maxen a|e lu. A|phan welas maxen ỻu kym+
eint a hỽnnỽ yn|y gyrchu ofynhau a oruc o pop vn o
dỽy fford o veint y ỻu Ac o ỽybot gleỽder y brytanẏ+
eit Ac nat oed gantaỽ ynteu vn gobeith o tagnefed
A galỽ y|henafgỽyr attaỽ a oruc a|meuruc vab ka+
radaỽc ac erchi kygor vdunt am hynny. Ac yna ẏ
y dywaỽt meuruc Arglỽyd heb ef nyt oes les
inni o ymlad a|r gỽyr racco Ac nyt yr mynu ymlad
y doetham yma. nac yr y* kyffroi y gỽyr racco yn dybryt
yn an herbyn heb achaỽs. namyn tagnefed yssyd
jaỽn y erchi vdunt a|ỻetty yny ỽypom vedỽl y bren+
hin ymdanam a|e ewyỻus. A|dywedut a wnaỽn an
bot a chenadỽri genhym y gan amheraỽdyr rufein
at eudaf vrenhin ynys prydein. Ac veỻy drỽy ym ̷+
adraỽd clayar keissaỽ tagnefedu ac ỽynt A gỽedy
bot yn ragadỽy bod y baỽb o·nadunt y kygor hỽnnỽ
Sef a oruc meuruc kẏmrẏt deu·degwyr o|wyr ỻỽydon
aduỽyn doethon a|cheig oliwyd yn|y ỻaỽ deheu y pop
vn onadunt A|dyuot hyt rac bron kynan A|gỽedy
gỽelet o|r brytanyeit y gỽyrda aduỽyn enrydedus
hẏnnẏ yn arwein oliwyd yn|y deheuoed yn arỽyd
| « p 63v | p 64v » |