NLW MS. 3035 (Mostyn 116) – page 94r
Brut y Brenhinoedd
94r
ti. hyt pan perfeither trỽy y ethrylithyr ef y gỽeith a
vyn·ut ti y|wneuthur. A gỽedy gofyn o Emrys ỻawer y
ỽrth vyrdin ef a|eỻygaỽd amryfaelon genadeu drỽy
amryuaelon wladoed y geissaỽ Ac o|e dỽyn attaỽ A
gỽedy crỽydraỽ onadunt ỻawer o|wledi. ỽynt a|e kaỽs+
ant ef yn ergig ar fynaỽn galabes. kanys mynych y
gnotaei ef pressỽylaỽ yno. A gỽedy menegi idaỽ beth
a vynynt. ỽynt a dugant vyrdin gyt ac ỽynt at y brenhin.
A|r brenhin a|e herbynyaỽd yn ỻawen. Ac a erchis idaỽ
dywedut petheu o|r a vei rac ỻaỽ. kanys chỽanaỽc oed
y warandaỽ petheu enryfed. A|myrdin a dywaỽt. Arglỽyd
heb ef ny dylyir datkanu y ryỽ betheu hyny namyn pan
vo aghenreit. A|e gymeỻo. kanys pei as dywettỽn yn geỻ+
weiredic y ryỽ ymadrodẏon hyny. Yr yspryt yssyd y|m dys+
cu i pan vei reit i|minheu ỽrthaỽ ynteu a gilhei y ỽrthyf i
y ymeith. A gỽedy na|cheffit gantaỽ dywedut dim o|r a
erchit idaỽ o daroganeu rac ỻaỽ. ny mynaỽd y brenhin
y volestu. namyn gofyn idaỽ gygor am y racdywededi+
gyon weithretoed a vynei y brenhin y|wneuthur Ac ar
hẏnẏ y dywaỽt Myrdin Os o tragywydaỽl weithret y
myny di teckau bedraỽt y gỽyr dylyedogyon hyn anuon
di yn ol kor y|keỽri yr hỽn yssyd y|mynyd kilara yn jwerdon
Yno y|mae kyweirdeb o vein Yr hỽn ny aỻei neb yn yr oes
hon y|wneuthur o·nyt o ethrylithẏr a tyfassei y geluydyt
kanys maỽr ynt y|mein. Ac ny darystygant y nerth neb
A|phei bydynt ỽy ar y|wed y|maent yno. vynt a|parheynt
yg|kylch y vedraỽt hon yn dragywydaỽl. ~ ~
A chwerthin a wnaeth emrys am yr ymadraỽd hỽnnỽ
a|dywedut py wed y geỻit dỽyn y mein kymeint a|r rei
hẏnẏ o|le kyn beỻet a|hỽnỽ Megys na bei yn ynys bry+
| « p 93v | p 94v » |