NLW MS. 3035 (Mostyn 116) – page 97r
Brut y Brenhinoedd
97r
a oruc y dysc y|r yscymun vradỽr hỽnỽ a chysgu megys
kyt bei o hyny y kaffei ynteu hoỻ jechyt a gỽaret. Ac
ny bu vn gohir ygyt ac y redaỽd y gỽenỽyn drỽy fe+
nestri y gorff. yn|y ỻe y deuth agheu yn|y ol yr hỽn ny
ỽyr ac ny myn arbet neb. Ac yn hyny rỽg vn ac
araỻ ỻithraỽ yr yscymun vradỽr aỻan. Ac nyt ym+
dangosses yn|y ỻys o hyny aỻan. A|hyt tra yttoedynt
ỽy yg|kylch hyny yd ymdangosses seren anryfed y|meint
a|e ỻeuuer ac vn paladyr idi Ac ar pen y paladyr hỽnỽ
yd oed peỻen o|tan ar lun dreic. Ac o eneu hono y ker+
dynt deu baladyr A hyt y neiỻ o·nadunt a|welit yn
ystynu dros terfyneu freinc a|r ỻaỻ a|welit y* kerdet
parth ac jwerdon Ac yn teruynu yn seith paladyr bychein.
A phan ym·dangosses y|seren hono; enryfedaỽt. ac ofyn
a|trewis paỽb o|r a|e gỽelas A|diruaỽr ofyn a|gymerth
vthur braỽt y brenhin. yn|y ỻe yd oed yg|kymrẏ yn
kyrchu y elynyon. A gofyn y|paỽb o|r doethon a oed ygyt
ac ef. py beth a arỽydockaei y seren hono Ac ym|plith
paỽb o|r rei hyny yd erchis ef dyfynu myrdin y|r ỻe.
A gỽedy dyuot myrdin a|sefyỻ ger y vron. vthyr a|erchis
idaỽ damỻewychu py beth a arỽydoccai y|seren rac+
dywededic vchot Ac yn|y ỻe ỽylaỽ a|oruc myrdin A
galỽ y yspryt attaỽ a dywedut val hyn O goỻet heb
ym·waret o ymdiuat bobyl vrytaen. O ageu y bone+
dickaf vrenhin. kanys diodefedic yỽ y|r ardyrchoccaf
vrenhin y brytanyeit emrys wledic ac yn|y a·gheu ef
yd abaỻem ni oỻ pei na rodei duỽ ynni ganhorthỽy
Ac ỽrth hyny y bonhedickaf tywyssaỽc vthyr brysya
ti bryssya ac na ohiir gỽneuthur brỽydyr a|th|elynyon
kanys y vudugolyaeth a vyd y|th laỽ. Ti a vydy vrenhin.
| « p 96v | p 97v » |