NLW MS. 3036 (Mostyn 117) – page 19
Brut y Brenhinoedd
19
hyt yg colofneu ercỽlf. Ac yna yd ymdangosses y
moruorynyon udunt a| chylchynu eu llogeu. Ac y
bu agos eu sodi o gỽbyl. Ac odyna y| doethant hyt
y mor tyren. A cheir llaỽ y| mor hỽnnỽ y kaỽssant
pedeir kenedyl o alltutdyon tro. o rei a| ffoassei gyt
ac antenor o tro. Ac yn| tywyssaỽc arnadunt Corine+
us. gỽr hynaỽs oed hỽnnỽ. goreu y| gyghor o|r gỽyr.
mỽyhaf y| nerth a|e leỽder a|e gedernyt. Pei ymtre+
chei a| chaỽr. ef a|e byrei mal y mab lleihaf. A guedy
ymadnabot o·honunt. gỽrhau a oruc corineus y
vrutus a|r pobyl a| oed gyt ac ef. A hỽnnỽ ym pop lle
o|r y bei reit ỽrth ỽr a ganhorthỽyei vrutus. Ac o+
dyna y| doethant hyt ym porth ligeris y gỽasc+
wyn. A bỽrỽ agoreu yna. Ac yna y gorffowyssy ̷+
sant y edrych ansaỽd y| wlat seith nieu.
AC yn yr amser hỽnnỽ yd oed goffar fichti yn
vrenhin y gỽasgỽyn a| pheitaỽ. A guedy cly+
bot o hỽnnỽ discynnu estraỽn genedyl yn| y wlat.
Anuon a| oruc attunt y| ỽybot beth a| uynnynt ae
ryfel ae hedỽch. Ac val yd oed kennadeu goffar
yn dyuot; y kyfaruuant a| chorineus ar y| deu can+
vet yn hely fforest y brenhin. A| gouyn a| wnaethant
pỽy a ganhatassei idaỽ hely forest y brenhin. kan ̷+
ys hen deuaỽt yỽ yr y dechreu; na dylyei neb he ̷+
ly forest y| brenhin na llad y aniueileit heb y| gan+
hat. Ac y dywaỽt corineus na cheissassei ef eiroet
ganhat am y kyfryỽ hỽnnỽ. Ac yna sef a oruc vn
| « p 18 | p 20 » |