NLW MS. Peniarth 11 – page 256r
Ystoriau Saint Greal
256r
yr hynny mỽy no chynt. A|minneu heuyt a|aỻaf vocsachu
gael kymeint a hynny. ac yna y gussanu a|oruc hi deirgỽe+
ith. ac ar hynny laỽnslot a|deffroes. ac a neityaỽd yn|y sefyỻ ac
a|roes arwyd y groc arnaỽ. ac a|edrychaỽd ar y vorwyn ac a
dywaỽt. och duỽ heb ef pa|le yr wyf|i. A vnben heb hi yr|wyt ~
yn ymyl y neb a|roes kỽbyl o|e chaỻon a|e charyat arnat heb
y ediuaru. A minneu arnat titheu heb·y laỽnslot. kanys pỽy
bynnac a|m|caro i ny chassaaf|i hỽnnỽ vyth. Arglỽyd heb hi
y casteỻ racko yssyd ar dy ewyỻys di ac y|th uedyant o·nyt ty+
di a|e gỽrthyt. ac am·danaf|inneu heuyt y geỻy di wneuthur
yr hynn a vynnych. Arglỽydes heb·y laỽnslot negessaỽl ỽyf
i yr aỽrhonn. kanys keissyaỽ medeginyaeth y varchaỽc y
varchaỽc urdaỽl yd ỽyf. yr hỽnn ny byd iach vyth o·ny byd
dwyn ohonaf idaỽ penn vn o|r griffyeit. Byd myn ỻaỽ duỽ
heb hi. a|hynny a|bereis i y|r vorwyn y dywedut ỽrthyt ti. yr
peri ytt dyuot y ymwelet a mi hyt yma. A vnbennes heb·y
laỽnslot minneu a|deuthum. a|chanys gỽ·eleist ditheu vinneu
mi a|af dra|m|kevyn. kanys nyt anghenreit ym gael penn y
griff. Och duỽ heb hi dy daet milỽr di yn ryỽ gyflỽr. a|th les+
get titheu a|th drycket yng|kyflỽr araỻ. ny thebygỽn i yn|yr
hoỻ vyt varchaỽc urdaỽl a|m gỽrthodei i o·nyt tydi. a|hyn+
ny yssyd yn|dyuot y titheu o valchder ac o|ryuic. a mi a vyn+
nỽn heb hi pei y griffyeit a|th lyngkassei di gyn no hynn.
pan|vuost yma. a|phei|tebygỽn etto aros ohonat ti minneu
| « p 255v | p 256v » |