NLW MS. Peniarth 11 – page 257v
Ystoriau Saint Greal
257v
deilyngdaỽt dy vilỽryaeth di. nyt ymagorei yr ysgrin yrot
vyth. ac ny aỻut gael na|r cledyf na|r amdo. Y·gyt a|hynny he+
vyt nyt aeth y·no eiryoet marchaỽc urdaỽl a|delei dra|e|ge+
vyn heb y lad neu y anafu onyt tydi. Yna y dinoethwyt
vn o|r seith gỽeli a|oed ym meliot. a laỽnslot a|roes y cledyf
a|r amdo ar y weli. a|r|dyrnaỽt a dechreuaỽd chwyssu ar hynt.
a meliot a|dywaỽt arnaỽ e|hun y bydei iach. LLawen vu gan
laỽnslot pan|wybu y bydei iach meliot.
L aỽnslot heb y vorwyn mi a|th gesseeis yn vaỽr yr pan
dugost y gennyf y gỽr mỽyaf a|garỽn. ac a|bereist i+
daỽ briodi vn araỻ. ac yr gỽneuthur afl˄es a blinder ytt. mi
a|roessum boen maỽr arnaf vy hun lawer gỽeith. Kanys
tydi a|wnaethost ymi y tristit mwyaf a|gefeis eirmoet. ka+
nys efo a|m caraỽd i yn vaỽr a|minneu a|e kereis ynteu. ac ny
ffaelya ef o|e garyat ymi vyth. Eissyoes peỻach yỽ hi y ỽrth+
yf|i noc y bu. ac o achaỽs y gymwynas a|wnaethost di ymi
yn|yr hynt honn. mi a rof vy ỻỽ ytti nat reit yt˄t ovyn gỽne+
uthur o·honaf|i ytti chweith drỽc vyth. Duỽ a|dalo ytt hyn+
ny heb·y laỽnslot. yn|y casteỻ hỽnnỽ y ỻettyaỽd ef y nos hon+
no. a|thrannoeth ef a|aeth ymeith. a gỽedy daruot idaỽ kym+
ryt kennat ef a|gerdaỽd tu a ỻys a* ỻys* arthur. yr honn oed
digaỽn meint y dechryn. kanys magdalans a|oed yn enniỻ
ỻawer o|r ynyssed y|ar arthur. a|phaỽb o|r a|enniỻei ef a|gym+
heỻei arnunt gredu y gret efo. ac yd oedynt ỽynteu yn|credu
| « p 257r | p 258r » |