NLW MS. Peniarth 45 – page 86
Brut y Brenhinoedd
86
urenin. yn|y ol. Ar gwas hỽnnỽ a uagyssit yn
ruuein. A|e moes a|e deuodeu a|dysgyssei. Ac ỽrth
hynny y carei ef wyntỽy yn uỽy no neb a|th+
alu y teyrnget udunt heb y warauun. Can+
ys yr holl uyt a|e talei udunt yna. Ac ar
uyrder ny bu urenhin yn ynys prydein. well noc
ef a anrydedei dyledogyon y teyrnas. Ac un
mab a anet y coel Sef oed y enỽ lles. Ac gỽe+
dy marỽ Coel y doeth lles y uab yn urenin. ~
A holl weithredoed da y dat a erlynỽys yn
gymeint ac y tebygit mae coel e hun oed.
A medylyaỽ a|oruc bot yn well y diwed noe
dechreu. Ac anuon a|oruc at eleuterius pap
y erchi idaỽ anuon gwyr fydlaỽn a prege+
thei gristonogaeth idaỽ. A chret a bedyd Ca+
nys gwyrtheu ar wnathoed yr ebestyl ar
hyt y byt. yn pregethu. Ac ar daroed goleu+
hau y calon ef. A|e uedỽl parth a duỽ. Ac
ỽrth hynny yd oed ynteu yn damunaỽ gỽir
fyd ac ynteu a|e cauas. Ac gỽedy gwelet
o|r pap hỽnnỽ y damunet ef. Sef yd anuo+
nes deu ỽr gredyuus ataỽ fydlaỽn yn|y glan
fyd catholic. y pregethu idaỽ ac yỽ pobyl
diffodedigaeth yr arglỽyd grist yg knaỽt.
Ac eu golchedigaeth wynteu trỽy glan
fynaỽn uedyd.
| « p 85 | p 87 » |