NLW MS. Peniarth 46 – page 4
Brut y Brenhinoedd
4
a chaffel yr eidal. a lauinia merch latinus
yn ỽreic idaỽ. a gỽedy ymlenỽi dieuoed
buched eneas. ascanius y|vab ef a ỽnae+
thpỽyt yn vrenhin. a gỽedy dyrchauel
ascanius a|r vrenhinaỽl gyuoeth. ef a adei+
lỽys dinas ar auon tyberis. a mab a|an+
et idaỽ. ac y|dodet arnaỽ siluius. a|r gỽ+
as hỽnnỽ gỽedy ymrodi y|ledradaỽl o+
dineb. a gorderchu a oruc nith y|lauini+
a a|e beichogi. a gỽedy gỽybot o|e dat
ef hynny. erchi a oruc o|e deỽinnyon dy+
ỽedut idaỽ pỽy a|veichogassei y vorỽyn.
a gỽedy caffel onadunt diheurỽyd o
hynny. ỽynt a|dyỽedassant bot y|vorỽ+
ynn yn veichaỽc ar vab a|ladhei y|vam
a|e dat. a gỽedy darffei idaỽ treiglaỽ
llaỽer o ỽladoed y dayar o|r diỽed y|daỽ
ar vlaenỽed goruchelder anryded. ac
ny|s tỽyllỽys eu deỽindabaeth hỽy cann
doeth eu deỽindabaeth. a gỽedy dyuot
oet y|r vorỽyn esgor. ar y|theuydle y
| « p 3 | p 5 » |