NLW MS. Peniarth 5 (The White Book of Rhydderch, part 1) – page 49r

pob personn yn wahanredaul a thruydi e| hun yn vn Argluyd wir velly truy yn cristonogaeth ni ac ynn

kyffredin greuyd yn guechdir ni y gadarnnhav eu bot wy ynn tri Duy ac yn tri Argluyd. Y Tat ny

wnnaethpuyt truy neb megys y gwnna gof neu saer kyllell neu ty nyt ohonnav e| hun na+

myn o defnyd arall megys o haearnn neu o brenn ̷ a heuyt ny chrevyt y Tat ̷ mal y crevyt y byt

neu angel neu eneit dyn ̷ ac ny anet y Tat o berson arall. Y Mab a anet o| r Tat e| hunan ac ny

wnaethpuyt ac ny chrevyt moe no| r Tat. Yr Yspryt Glan a deuth ac a deillydaut o| r Tat a| r Mab

ac eissoes ny wnaethpuyt ef ac ny chrevyt moe no| r Tat neu yr Mab ac ny anet yr Yspryt

Glan mal y ganet y Mab. Canyt mab yr Yspryt Glann y| r Tat Duv ac nyt wyr idav mal

pei y vot yn vab o| e Vab. Namyn vn garyat yv ef y Tat ar y Mab ar y Mab ar y Tat me+

gys cupyl yrydunt yn eu kyssylltu ygyt ac yn an hechvg ninheu ac yn gvascv vrthunt vy.

Vrth hynny vn Tat yssyd yn y Trindaut ac nyt tri That ac vn mab ac nyt tri Meib ac vn Yspryt

Glann ac nyt tri Yspryt. Ac yr geni y Mab o| r Tat a deillyau yr Yspryt Glan o| r Tat a| r Mab

eissoes nyt oes yn y Trindaut honn dim gynt no| e gilyd na dim hvyrach no| e gilyd na dim

voe na dim lei no| r llall; namyn y teir person gogyuoed a gogymeint ynt. A gwir mal y dyves+

puyt vry yn y dechreu y dylyir ym pob pvnnc enrydedu y Trindaut yn yr Vndaut a| r Vnda+

vt yn y Trindaut. Pwy bynnac vrth hynny a vynho iechyt a lles o| e eneit velly y dyly credu

yn y Trindaut. A chyt a hynny reit yv y gaffel iechyt a guaret tragywydaul credu yn gy+

wir kymryt o Iessu Grist an Hargluyd ni cnavt dyn y|mru yr Argluydes Veir. Ac vrth hynny

honn yv y gret iavn credu ohonam ni ac adef vot Iessu Grist yn Argluyd ni yn Vab y Duv ac

yn Duv gvir ac yn wir dyn. Duv yv ef a anet o| r Tat heb dechreu kynn yr holl oessoed a dyn yv

ef a anet o Veir e vam ac yn vorwyn yr yr oes diwethaf o oessoed y byt hvnn. Canys yr oes

gyntaf o| r oessoed a barhavd o Adaf hyt ar Noe a| r eil oes o Noe hyt at Euream Benn Ffyd

a| r tryded oes o Evream hyt at Voessen e petwared oes o Voessen hyt at Dauid vrenhin a phuyt

e pymhet oes o Dauid vrenhin hyny aeth plant Euream Penn Ffyd yn geith y Babilonn Vaur; e

chuechet oes a uu o| r amsser y deuth plant Euream o geithineb Babilon dracheuen y wlat Caerussalem.

E seithuet oes yv o| r amsser y deuth Mab Duv yn knaut dyn hyt dydbravt a| r wythuet oes vyd

o dydbraut yn tragywyd heb diwed arnei. Iessu weithonn y gur a anet o| r Tat Duv kynn yr amsseroed

ac o Veir Argluydes ynn yr amsser teruynnedic ̷ yssyd Duv perffeith a dyn perffeith druydav e| hunan

o gorff ac eneit. Gogybennet a gogymeint yv ef a| r Tat o bleit y dvyolaeth a llei yv ef no| r Tat o

bleit y dynolaeth. A chyt boet Duv ef a dyn eissoes nyt deu ef. Sef yv hynny nyt dvy personn Iessu

Grist malpei vot y neill person yn Duv a| r llall yn dyn; namyn Duv a dyn vn Grist yv ac vn personn.

Vn hagen yv ef mal hynn nyt malpei symut y dvyolaeth yn dynolyaeth ac na bei dvyolaeth

wedy hynny; megys byrryit dauyn o win y|myvn llauer o dvfyr ny thrigyei y dauyn yn win wedy

hynny namyn y symut y dvuyr. Nyt velly yd aeth Duv yn dyn namyn Mab Duv a gymerth gvir

annyan dyn corff ac eneit yn vn personnolyaeth ac ef. Ac eissoes annyan Duv a trigyavd yn wir

annyan Duv mal kynt ac annyan dyn a trigyavd yn wir annyan dyn ac yn vn gvr cvbyl ac yn vn

personn. Ac vrth hynny vn yv Duv a dyn heb gymyscu hagen y dvyolaeth ac annyan dyn mal

pei na thrigei y dvyolaeth a| e dynolyaeth yn eu hannyan kyuan mal kynt namyn symud yn try+

dyd annyan. Megys pan vwyttao dyn amrauaelon vvydeu ny thric vn ohonunt yn y liv nac yn y

annyan mal kynt namyn y symut a wneir yn anyan y dyn. Neu pan gymescer gvin a dvuyr yn

vn vessur y kymysc hvnnv ny byd na gvin na dvuyr namyn vn peth trydyd. Nyt velly y kyssyllt+

vyt Duv a dyn yn vn person Iessu Grist malpei vot Crist yn ryv beth trydyd hep y vot yn Duv nac yn

dyn. Canys megys o eneit dylyedus a dyall genti ac o gorff y byd vn dyn guir velle Duv a dyn yssyd Ie+

ssu Grist. Canys megys o eneit a chorff y byd vn berson dyn a chyt a hynny nyt o bleit y corff y

byd perssonolyaeth dyn namyn o bleit yr eneit a| r eneit a dichaun bot truydi e| hunan hep y corff

wir velly o Vab Duv ac o annyan dyn a gymerth ef y mae vn person Iessu Grist yn vn Duv hagen ac

yn dyn mal kynt eithyr vot yn personolyaeth oll o bleit Duv ac nyt truy annyan dyn. A Mab

Duv heuyt a uu truydav e| hunan kynn kymryt ohonav annyan dyn yn vn person ac ef  a

all  hep annyan dyn beis mynnei mal y bu kynn no| e eni o| r Argluydes Veir. Ac eissoes nyt