NLW MS. Peniarth 6 part iv – page 36
Geraint
36
issaf y dan y tref. Na dos ti ar y tir o|r tu draỽ y|r bont ony
mynny ymwelet ac efo. kanys y|gynnedyf yỽ. na daỽ
marchaỽc ar y tir na mynho ef ymwelet ac ef. y·rof|i a duỽ
heb·y Gereint Miui a gerdaf y fford val kynt yr hynny. Teby ̷+
gach yỽ genhyf nu os uelly y|gỽney y keffy gewilyd a gỽ ̷+
arthaet. yn orulỽg galonnaỽc dic kerdet a oruc Gereint y|r
fford val yd oed y vedỽl kyn no hynny. Ac nyt y fford a gy ̷+
rchei y tref o|r bont a gerdaỽd Gereint. namyn y fford a gyr ̷+
chei y kefyn kalet·tir erdrym aruchel dremynuaỽr. Ac ef a
welei varchaỽc yn dyuot yn|y ol y|ar katuarch kadarnteỽ
kerdetdrut llydangarn bronheanc. Ac ny welsei eiroet gỽr
lei noc a welei ar y march. A dogynder o arueu ymdanaỽ ac
am y varch. A phan ymodiwaỽd a gereint y dywaỽt ỽrthaỽ. Dy ̷+
wet vnben heb ef. Ae o anỽybot ae o ryfyc y keissut ti colli
o·honof|i vy mreint A|thorri o·honof|i vyg kynnedyf. Nac
ef heb·y Gereint ny wydyỽn i kaethu fford y neb. kanys gỽydy ̷+
ut heb ynteu deret gyt a|mi y|m llys y|wneuthur iaỽn im.
Nac af myn vyg cret heb ef. nyt aỽn y lys dy arglỽyd onyt
arthur uei dy arglỽyd. Myn llaỽ arthur nu mi a vynnaf iaỽn
y|genhyt. neu vinheu a gaffỽyf diruaỽr ouit y|genhyt ti.
Ac ymgyrchu a orugant. Ac yswein idaỽ ef a|deuth y wassa ̷+
naeth a|r peleidyr mal y torrynt. A dyrnodeu kalettost
a|rodei pop vn yn taryan y|gilyd. hyny golles y taryaneu
eu holl liỽ. Ac amprytuerth oed y ereint. ymwan ac ef rac y|uy+
chanet ac anhaỽdet craffu arnaỽ. A chalet y dyrnodeu a
rodei ynteu. Ac ny digyassant ỽy o hynny hyny dygỽyd+
aỽd y|meirch ar tal eu glinyeu. Ac yn|y diwed y byryaỽd
Gereint ef hyny yttoed yn ol y penn y|r llaỽr. Ac yna yd aeth+
| « p 35 | p 37 » |