BL Additional MS. 19,709 – page 31v
Brut y Brenhinoedd
31v
yn yr ymlad hvnnv y ỻas geta. ac yna y kafas
basianus y vrenhinyaeth drỽy nerth y brytanyeit.
A c yn yr amser hỽnnỽ yd oed gvas ieuanc
clotuaỽr yn ynys. prydein. sef oed y enỽ. karaỽn ac
ny hanoed o lin teyrned namyn o lin issel ac ei ̷+
ssoes gvedy kaffel clot ohonaỽ yn ỻawer o ymla ̷+
deu o|e devred a|e fynyant kychwynt parth a
rufein a oruc y geissav kanhat y gan sened rufein
y|warchadỽ o·honaỽ ar logeu aruortir ynys. prydein.
rac estraỽn genedyl. ac adav o da udunt am hynẏ
digavn pei kenhettit idav vrenhinyaeth ynys
.prydein. a gỽedy tỽyỻav ohonav sened rufein drvy y
ryv edewidyon tvyỻodrus hynny a|chaffel canat
y|r hyn yd oed yn|y geissav ymchoelut a wnaeth
parth ac ynys. prydein. a|e negeseu gantaỽ drvy gedernit
a ỻythyreu a·goret ac inseileu senedwyr rufein
ỽrthunt a gvedy y dyuot y ynys. prydein. kynuỻaỽ am+
ylder o logeu a oruc a galỽ attaỽ hoỻ ieuenctit
ynys. prydein. a|chychwyn ẏ|r traetheu a gỽneuthur
kynỽryf maỽr yn yr hoỻ teruynheu ac y·gyt a
hẏnnẏ dvyn kyrcheu mynych y|r ynysed yn|y ky+
lch. ac eu hanreithav ac eu ỻosgi a distryv eu kes ̷+
tyỻ a ỻad eu tir·diwyỻodron. a|thra yttoed eff
veỻy pavb o|r cribdeilwẏr ereiỻ a gyrchei attav y
ỽrhau idaỽ ac ar pen yspeit vechan kymeint oed
y nifer ac nat oed haỽd y vn tywyssaỽc ymerbyn+
eit ac ef na gỽrthỽynebu idaỽ. ac vrth hynẏ
Sef a|oruc karaỽn ymdrychafel yn syberwyt.
| « p 31r | p 32r » |