BL Additional MS. 19,709 – page 68r
Brut y Brenhinoedd
68r
ynys. prydein. ac arthur a|e haruoỻes ynteu o|r enryded y gỽe+
dei aruoỻ gỽr kyfurd a hỽnỽ. ac yn vynych y|dam+
blygu y ymgaru pop eilwers. ac odyna gỽedy ỻith+
raỽ ychydic o|dydyeu. ỽynt a gyrchyssant parth a|cha+
er lỽytcoet yr hon a|elwir lincol yr aỽr·hon. ac yssyd
ossodedic yn|y wlat a elwir lindysei ar ben mynyd rỽg
dvy afon. ac vrth y gaer honno yd oed y|paganyeit yn
eisted. a gvedy eu dyfot yno y·gyt ac eu hoỻ niueroed;
ymlad a orugant a|r saesson. ac aglywedic aerua a|wna+
ethant ohonu. kanys whe|mil o·nadunt a|dygỽydassant
yn yr vn dyd hỽnnỽ. rei oc eu ỻad ereiỻ oc eu bodi y+
n|yr afonoed a|goỻassant eu heneideu. ac vrth hynny y
rei ereiỻ yn gyflaỽn o ofyn adaỽ y dinas a|orugant. a
chymryt eu fo yn|y ỻe yn ỻe diogelỽch vdunt. ac ny
orffowyssỽys arthur oc eu hymlit hyt pan deuthant hyt
yn ỻỽyn kelydon. ac yno ymgynuỻ o|pop ỻe oc eu fo
a orugant a medylyaỽ odyno gvrthvynebu y arthur.
ac odyna gỽedẏ dechreu ymlad aerua a|wnaethant o|r bry+
tanyeit gan eu hamdiffyn e|hunein yn vraỽl. kanys
o wasgavt ẏ|gỽẏd yn eu kanhorthvy yd aruerynt. ac ẏ
gochelynt ergyttyeu y brytanyeit. a|phan welas arthur
hẏnnẏ yd erchis ynteu trychu y coet o|r parth hỽnnỽ
y|r ỻỽyn. a|chymryt y kyffyon hẏnẏ ar traỽs ac eu gos+
sot yn eu kylch. ac eu gvarchae yno megys na|cheffynt
vynet odyno. yny ymrodynt idaỽ neu yny vydynt
veirv o|newyn. a gỽedy daruot gvneuthur y kae. y dodes
arthur y varchogyon yn vydinoed yg|kylch y ỻvyn. ac
| « p 67v | p 68v » |