NLW MS. 24029 (Boston 5) – page 67
Llyfr Blegywryd
67
eic a|e dỽc ef tẏghet ar|ẏr allaỽr gẏssegẏr
onnẏ chredir heb ẏ thỽg. neu onnẏ wedir
cỽbẏl ẏnn|ẏ herbẏn. Teir gormes doeth
ẏnt; Medaỽt. A|godineb. a|drẏc·anẏan.
TRi dẏn a|dẏlẏ tauotẏaỽc ẏn llẏs; ẏ|gan
ẏ|brenhin. gỽreic. ac alltut agẏfueithus.
A chrẏc anẏanaỽl. Vn dẏn hagen a|dẏlẏ
dewis ẏ|tauotẏaỽc. arglỽẏd. ~ ~ ~ ~ ~ ~ ~
T Ri llẏdẏn digẏureith eu gỽei+
thret ar anẏueileit mut ẏssẏd;
stalỽẏn. A|tharỽ trefgord. A|ba+
ed kenuein. Digyureith he+
uẏt ẏỽ; gỽeithret tarỽ tra geisso gỽar+
thec gỽassot. o|galan mei hẏt galann
gaẏaf. Ac ẏstalỽẏn tra geisso gessẏc gỽ+
ẏned. A|baed tra vo llodicrỽẏd ar|ẏ|moch
ẏ|bo arnunt. nẏ diwẏgant a|wnelhỽẏnt
ẏna. TRi llẏdẏn nẏt oes werth kyfreith.
arnunt. Knyỽ hỽch. A bẏtheiat. A|char+
lỽg. TRi gỽaet digẏfreith ẏssẏd; gỽaet
o benn crach. A gỽaet deint. A gỽaet trỽ+
ẏn. onnẏt trỽẏ lit ẏ|gollẏgir. TRi th+
an digẏureith a|dotto dẏn ẏnn|ẏ tir e|hun
ẏssẏd; tan godeith o|hanner maỽrth hẏt
hanner ebrill. A than odẏn trefgord. A|th+
| « p 66 | p 68 » |