Cardiff MS. 1.363 (Hafod 2) – page 202r
Brut y Brenhinoedd
202r
Ac gwedy mynegy henny y edwyn ef a kynnỽ+
llavd attaỽ holl ỽrenhyned e ssaysson a hyt e
maes a elwyr hedfeld en erbyn katwallavn a
dechrev ymlad ar brytanyeyt. Ac en e lle ar
dechrev er ymlad e las edwyn a|e holl pobyl ha+
yach ac offryt y vap y gyt ac ef. a Gotholt bren+
yn orc a dothoed en porth ydaỽ. ar rann wuy+
haf oc ev llw y gyt ac wynt.
AC gwedy katwallaỽn kaffael o e wudvgoly+
aeth kerdet a orỽc trwy wladoed e|saysson
en kyn krevlonet ac nat arbedey y nep namyn en
e lle e gwelhey sayssnes en veychyavc a|e cledyf ed
ellynghey y beychyogy yr llawr. ac e velly nyt ar+
bedvs nac y wr nac y wreyc. nac y was. nac y vap.
kanys ef a vynney en llwyr eyllyaỽ kenedyl e ssay+
sson o|r enys honn en hollaỽl. Ac|wrth henny pa|rey
bynnac a kaffey onadvnt o angklywedygyon po+
enev y dyvethaey. Ac o|r dywed brwydyr wu y+
dav ac offryt er hwnn a deỽth gwedy edwyn
a hvnnv a las a|e dev neyeynt er rey a deleynt v+
od yn gwledychv gwedy ef.
| « p 201v | p 202v » |