Cardiff MS. 1.363 (Hafod 2) – page 74r
Brut y Brenhinoedd
74r
pryaỽt tref tat wynt. Ac ena e mavrhavs er
holl kyvoethavc dyw y trvgared ef em plyth
e brytanyeyt. rac ev tewyllaw wynt o nossawl
tewyllvc aghev er rodes ef eglvraf lampev +
e seynt ar merthery a ennvynvs vdvnt
A|bedev er|rey henny ar lle e kymerassant ev mer+
thyrolaeth trwy gwres caryat em mevn bryt a
medvl e nep a edrycho a dangossant ev gwyrthy+
ev pey na bey kvynvanvs klybot y gan agkyfye+
yth kenedyl er ryw dystryw hvnnv ar kywdavtwyr
enys prydeyn. Ac em plyth pavb o|r pobloed a ver+
thyrwyt ena e dyodevassant mylwyr em mydyn
Cryst. Seynt alban o verolan. ac wl. ac aaron o ka+
er llyon. A seynt alban hagen o wres kymerwedyc
cardavt a kymyrth amphybal y kyffessvr ef o lav er
rey a|e merthyrey ac en kyntaf a|e kvdyws en|y ty e h+
vnan. ac odyna a symỽdvs e dyllat. ac|a|e ellynaws*
y emdeyth. ac ed emrodes entev e hvnan y verthyry+
olaeth. Ar rey ereyll trwy amravalyon poynev ar
ev corfforoed a|e ehedassant ar orwchelder llewenyd
AC en er amser hvnnv [ gwlat nef hep vn pedrvs.
e kyỽodes koel yarll kaer coelun en erbyn
| « p 73v | p 74v » |