Breudwd Welsh Prose 1300-1425
Cymraeg

Cardiff MS. 3.242 (Hafod 16) – page 15

Llythyr Aristotlys at Alecsander: Pryd a Gwedd Dynion

15

rac dyn drycdynghetuennaỽl. ac rac dyn ac eisseu aelodeu
arnaỽ megys yd|ymogelut rac|dy|elyn. Kyfyaỽnaf ac ar+
dymerussaf creadur yỽ dyn gỽedus kymhedraỽl. a|ỻygeit
duon. a|gỽallt du. ac wyneb crỽnn. Da yỽ ỻiỽ brychwynn
a ỻiỽ dỽnn ardymherus yn gyuan y|gorff ac yn gyfy+
aỽn o|hyt a|ỻet. ac yn|gyuartal y benn ac ychydic o eireu
onyt ỽrth aghenreit. yn gymhedraỽl y lef o vraster a
meinder. Pan|drosso y|natur amgen ar|dued a gỽynder
yn|y heneint; yna y|byd goreu yr ardymer. bit hoff ia+
ỽn gennyt hỽnnỽ a|chymer ef gyt a|thi. Gỽaỻt ỻyfyn
hynaỽs a|arỽydockaa hynaỽster ac oeruel y|r emennyd.
llawer o vleỽ yn syrthyaỽ ar|bob ysgỽyd a|arỽydockaa
ffolineb ac ynuydrỽyd. ỻaỽer o vleỽ ar|y dỽy·vronn a|r
groth a|arỽydockaa dryc·anyan ac eisseu dyaỻ a|charu
sarhaedeu. Gỽaỻt coch. arỽyd anosparth yỽ a ỻit maỽr
a thỽyỻ a|brat. Gỽallt du arỽyd kyfyaỽnder a|charu
gỽiryoned. Gỽaỻt gỽineu; arỽyd dyn karedic yỽ.
Pỽy bynnac y bo ỻygeit maỽr idaỽ; dyn kynghoruynn+
us yỽ di·gewilyd ỻesc ynuyt ac yn|bennaf o|r|bydant
rudeỻ. Pỽy|bynnac y bo ỻygeit kyuartal idaỽ gleisson
neu|duon; da vyd y dyaỻ a|chỽrteis a|ffydlaỽn. Y neb
y bo ỻygeit rac·issel yn edrych ryngthaỽ a|r ỻaỽr; maỽr+
drygyaỽc vyd ac enwir. Y neb y bo idaỽ ỻygeit kyn+
hebyc y lygeit assen; anoeth vyd a|chalet y|natur.
Y|neb y|bo idaỽ lygeit troedic a golỽc lem orwyỻt; ỻei+
dyr ac angkywir a thỽyỻodrus vyd. O|r byd|ỻygeit
cochyon idaỽ; maỽrvrydic vyd a|chadarn a gaỻuaỽc.