BL Harley MS. 958 – page 36v
Llyfr Blegywryd
36v
pedeir keinhaỽc dros padeỻ ẏ wneuthur
medeginẏaetheu. pedeir keinhaỽc dros
wer. keinhaỽc dros ẏ oleuat beunoeth.
keinhaỽc dros uỽẏt ẏ medic peunẏd. A
cheinaỽc dros uỽẏt ẏ brathedic peunẏd.
Pedeir keinhaỽc cotta a telir ẏ dẏn dros
pop ascỽrn uch creuan a|tẏnher o|e pen o|r
a seinho ẏ mẏỽn kaỽc euyd. O pop ascỽrn
is creuan pedeir keinhaỽc kẏfreith a|geif.
Kẏfreith a dẏweit bot ẏn vn werth aelo+
deu pop dẏn a|e gẏlẏd. O|r torrir aelaỽd
ẏ brenhin ẏ uot yn vn werth ac aelaỽd ẏ
bẏlein. Ac eisoes mỽẏ ẏỽ gỽerth sarhaet
brenhin neu vreẏr. no sarhaet bilein o|r
trẏchir ẏ aelaỽt.
Y neb a gnithẏo dẏn. talet ẏ sarhaet ẏn
gẏntaf. kanẏs drẏchaf a gossot ẏỽ sar+
haet dẏn. A|cheẏnaỽc ẏg kẏfeir pop bẏs
a el ẏn|ẏ pen. A dỽẏ ẏg kẏfeir ẏ vaỽt. A chei+
naỽc dros pop blewẏn bonwẏn a tẏnher o|e
pen. A phedeir ar hugeint dros ẏ gwaỻt
taldrỽch. Dẏrnaỽt a gaffo dẏn o anuod nẏt
sarhaet; iaỽn ẏỽ hagen diuỽẏn ẏ gwaet a|r
weli a|r greith o·gẏfarch o|r bẏd. Dewisset
| « p 36r | p 37r » |