Oxford Jesus College MS. 119 (The Book of the Anchorite of Llanddewi Brefi) – page 118v
Ystoria Adrian ac Ipotis
118v
y|diodefuaỽd onndras ar|y|groc. Ac y|dyỽat. Ar+
glỽyd heb ef llyma a|diodefuaf|i yr karyat ar+
nat ti. Vnuet ar|dec yỽ. dyỽ gwener y kauas E+
len luydyaỽc y|groc ry|daroed yr eideỽonn y|ch+
udyaỽ yn|y dayar achos y|diodefuei crist arnei.
Ac ar honno y|diodefuaỽd yntev gỽedy y|dỽynn
y|vynyd caluarie trỽy enryded molyanus.
Deudecuet yỽ. Dyỽ gỽener. y|merthyryỽyt pe+
der a|phaỽl ebostol. Tryded|ar|dec yỽ. Dyỽ gỽe+
ner y|ryd duỽ varnnedigaeth o|e draet a|e dỽylaỽ
a|e ystlysseu yn waetlyt. Ac am hynny kymeret
paỽb dyỽ gỽener yn|y gof y|ỽneuthur molyant
y|duỽ yndaỽ trỽy vnprydyeu a gỽedieu. Dyỽ sa+
dỽrnn da yỽ ynprydyaỽ yr myỽn yr arglỽydes
veir an|nerthaỽd y|dynnv yr eneideu o|r poenev.
A|hi a|elỽir yn ffynnaỽn y|drugared. y|olchi ac y
prudhav paỽb o|r a alỽho arney. ar|wedỽreic gỽiro+
ned y gelỽir. ohonei y|deuth iessu grist iachỽaỽdr
y|byt. benndigedic vo y|pobloed a|ỽassanaetho y
vorỽyn honno trỽy eỽyllys adỽynedic. Yna y
dyỽat yr amheraỽdyr adrian vrth y|mab. Mi a|th
tyghedaf ti vab Jpotis kynn ymadaỽ a|mi. yn
enỽ y|tat ar mab ar yspryt glan. iessu grist yr
hỽnn a|diodefuaỽd yn anghev yr yn kyuodediga+
eth ni. py beth ỽyt ti a|e yspryt da. a|e vn drỽc
| « p 118r | p 119r » |