NLW MS. Llanstephan 27 (The Red Book of Talgarth) – page 84v
Ystoria Adda, Mabinogi Iesu Grist
84v
y dywaỽt hi proffỽydolyaeth o|r pymthec arỽyd kynn dyd
braỽt. A phan daruu idi amrysson a|selyf. hi a|gafas
yndaỽ yngnadaeth uaỽr ac a|e duc genth* y gỽlat. Ac ue+
ỻy y bu y prenn bendigeit yn gorwed ar y dỽfyr hỽnnỽ hyt
yr amser y diodefaỽd yn arglỽyd ni iessu grist. a phan
yttoedynt y creulonyon Jdewon gỽedy barnu iessu grist
y angeu y dywaỽt vn o·nadunt trỽy broffỽydolyaeth.
Kymerỽch y brenhinbrenn yssyd yn|gorwed ar draỽs y
dỽfyr. a gỽneỽch o·honaỽ groc y vrenhin yr idewon. Ac
uelly y gorugant ac y kymerassant y dryded rann o|r prenn
ac y gỽnaethant groc o·honaỽ. seith gupyt o|hyt. a|thri ar
draỽs. ac a|e dugassant hyt y|mynyd caluarie. ac y crogassant
arnei yn arglỽyd ni iessu grist. y gỽr a|n Jachaa ni oỻ o|r
mynnỽn y haedu. Duỽ a|wnel ynn gaỻu gỽneuthur yn|y
mod y dywedeis i. a|e vynnu o duỽ. megys y bu yn prynediga+
eth ni o|r vn·ryỽ groc. ac o|r vn prenn y|n coỻet. ac o|r vn·ryỽ
ffrỽyth yn gyntaf. a megys y|n gỽahanỽyt ni y ỽrth yn cre+
aỽdyr o achaỽs gỽreic. veỻy y|n kyfuner ninneu a|duỽ trỽy
rat gỽreic. a·men ~
*Dechreu meir a|r mod y kaffat.
Y n|y dydyeu hynny yr oed gỽr yn|yr israel Joachim oed y
enỽ o|lỽyth Juda. a hỽnnỽ bugeil deueit oed. ac ovyn duỽ
arnaỽ yn|y vulder. yr hỽnn nyt oed amgen bryder arnaỽ no
chadỽ y deueit. o|r rei y porthei ef y saỽl a ovynheynt duỽ. ac
yn rodi deu·ryỽ rodyon yn ovyn duỽ y|r rei a|lavuryynt yn
y dysc. a|r rei a|e gỽassanaethyei o wyn. a mynneu. a|gỽlan.
a|e hoỻ|da bop blỽydyn yn deir rann a rannei. vn o·nadunt
The text Mabinogi Iesu Grist starts on line 20.
| « p 84r | p 85r » |