NLW MS. 3035 (Mostyn 116) – page 158r
Brut y Tywysogion
158r
vdunt. Ac yna y|rodet mab cadỽgaỽn ap bledyn yr hỽn a anysit
o|r franges yr hỽn a|elwit henri. ac y talỽyt can morc drostaỽ.
ac yna y rodet y|wlat idaỽ eff. a|ỻawer a|dalaỽd. ac yna y geỻyg+
aỽd Mab kadỽgaỽn. ac yg gyfrỽg y|petheu hyny y gỽnaeth ywein
a|Madaỽc ac eu kytymdeithon ỻawer o|drygu yg gỽlat y|freinc
ac yn ỻoegyr. a|pha|beth bynac a|gehynt nac o ledrat nac o dreis
y tir Joruerth y dy·gynt. ac yno y|pressỽlynt. ac yna anuon ke+
nadỽri a oruc Joruerth attunt yn garedic a dywedut ỽrthunt
val hyn. Duỽ a|n rodes ni yn ỻaỽ an gelẏnyon ac a|n darestygaỽd
yn gymeint ac na aỻem gỽneuthur dim o|r a vei ewyỻus
genym. Gỽaharedic yỽ yni baỽb o|r brytanyeit hyt na|chyf+
redino neb ohonom ni a|chwichỽi nac o vỽyt nac o diaỽt
nac o|nerth nac o|ganhorthỽy. namyn aỽch keissaỽ a|ch hely
ym|pop ỻe. a|ch|rodi yn|y|diwed yn ỻaỽ y|brenhin o|ch|carcharu
neu y|ch ỻad neu y|ch diuetha neu yr hyn a vynei a|chỽi ac
yn benaf y|gorchymynỽyt ymi a chadỽgaỽn nat ym·gredem
a|chỽi. kanẏs ny digaỽn neb ty·bygu na damunaỽ tat neu
ewythyr da y|ỽ meibon a nyeint. kanẏs ot ym·getymdeithỽn
dim a|ỽchi neu vynet hayach yn erbyn gorchymyneu y bren+
hin ni a goỻỽn an kyuoeth ac a|n|karcherir yny vom veirỽ
neu a|n ỻedir. ỽrth hyny mi a|ch gỽediaf megys kyfeiỻt a mi
a|ỽch|gorchymynaf megys arglỽyd ac a|ỽch eiroljaf megys kar
na deloch ford y|m kyfoeth. i. na for* y gyfoeth kadỽgaỽn
mỽy noc yg|kyfoeth gỽyr ereiỻ y|n kylch. kanys mỽy o an+
nodigaetheu a geissir y|n erbyn ni noc yn erbyn ereiỻ yn bot
yn gylus a|thrymygu hẏnẏ a|wnaethant. a mỽynỽy eu
kyuoetheu a vynychynt. ac abreid y gochelynt gyndrych+
older y gỽyr e|hunein. a joruerth a geissaỽd eu hymlit a|chyn+
| « p 157v | p 158v » |