NLW MS. Peniarth 11 – page 101v

mynnei ef amgen grys no|r beis raỽn. Ac yna vn o|r niuer a

dywaỽt. arglỽyd heb ef ti a eỻy adel yni y beis raỽn. kanys dy

bererindaỽt ti a|daruu. ac ouer oed ytt weithyon lauuryaỽ mỽy.

a|gỽybyd di yn|ỻe gỽir na wely di beỻach mỽy o anturyeu noc a

weleist. yr|hynny ual kynt laỽnslot a|gymerth y beis raỽn ac a|e gỽis+

gaỽd. ac ar warthaf y beis raỽn ef a|wisgaỽd y diỻat ỻiein. ac ar u+

chaf hynny y diỻat ereiỻ. ac odyna ef a|ducpỽyt y ymỽelet a|r niuer

o|r ty. ac ar hynt ỽynt a|e hadnabuant. ac a|dywedassant. Ae laỽns+

lot heb ỽynt yssyd yma. Je heb ynteu yn wir. ac ỽynteu a|wnaeth+

ant y ỻewenyd mỽyhaf a aỻassant idaỽ. ac yno y bu laỽnslot be+

dwar diwarnaỽt yn gorffowys. ac yn|y pymhet dyd ac ỽynt yn kym+

ryt eu kinyaỽ. ef a doeth seint greal ac a|gyflaỽnaỽd paỽb o|r bỽydeu

hoffaf ganthaỽ. ac ual y bydant yn bỽyta ef a|doeth antur ryued

attunt. nyt amgen kỽbỽl o|r|drysseu yn kaeu e|hunein. ac ar hynny

nachaf marchaỽc urdaỽl yn aruaỽc ar|gevyn march maỽr yn

dyuot y|r porth ac yn erchi ar hynt agori. a|r rei ody|vyỽn heb vyn+

nu agori idaỽ. ac ynteu yn|ysmala a|erchis agori yny digyaỽd

y rei ody vyỽn ỽrthaỽ. ac vn a|gyfodes y vyny ac a|roes y benn

drỽy ffenestyr y tu ac att y marchaỽc. ac a|dywaỽt ỽrthaỽ. Tydi var+

chaỽc urdaỽl. ny daỽ yma y|myỽn neb a|vo kyfuch y varchogyat a

thydi tra vo yma seint greal. ac am hynny dos y|th wlat dy hun. ka+

nys nyt ỽyt ti vn o|r keis yn iaỽn. namyn ti a edeweist wassanaeth

iessu grist ac a aethost y wassanaethu y drycwas. 

A  phan gigleu y marchaỽc hynny ef a|uv drỽm a|thrist ac

amharchus ganthaỽ y hynt hyt na wydyat beth a|wnaei.

ac ymchoelut drachefyn ymeith a|oruc ef. a|r marchaỽc araỻ yna