Breudwd Welsh Prose 1300-1425
Cymraeg

NLW MS. Peniarth 18 – page 41v

Brut y Tywysogion

41v

ac ef drỽy gyghor y|brenhin holl tyỽyssogyon y
deheu a uuessynt ygỽrthỽyneb yr brenhin 
. nyt amgen. cadỽallon ap madoc o va+
elenyd y gefynderỽ. Ac einaỽn clut o|eluael y|daỽ
gann y verch. Ac einaỽn ap rys o|ỽerthrynny
on y|daỽ y|llall. A Morgan ap caradaỽc ap iestin
o|ỽlat uorgant. o|ỽladus y|hỽaer. A grufud ap  iuor ap
meuryc o|seinhenyd y|nei o nest y|hỽaer. a Jor+
uerth ap yỽein o|gaer llion. A seisyll ap dyfynỽal
o ỽent vch coet y|gỽr yr oed yna gantaỽ yn pri+
aỽt gỽladus hỽaer yr arglỽyd rys. hynny oll
o|tyỽyssogyon a|ymhoelassant ỽy gỽladoed yn
hedychaỽl gyt ar arglỽyd rys. y|gỽr a|oed gare+
dicaf gyueillt gann y brenhin yn|yr amser hỽnnỽ
drỽy ymhoelut caer llion dracheuen y ioruerth
ap yỽein. Yn|y lle ỽedy hynny y|llas seisyll ap dyf+
ynwal drỽy dỽyll arglỽyd brecheinnaỽc. A|chyt
ac ef grufud y|vap a|llaỽer o|bennaduryeit gỽent.
Ac yna y|kyrchaỽd y|ffreinc lys seissyll uap dyfyn+
ỽal. a gỽedy dala gỽladus y|ỽreic y|lladyssant ca+
dỽaladyr y|vab. Ar|dyd hỽnnỽ y|bu y|druanaf aer+
ua ar|ỽyr gỽent. A gỽedy y|kyhoedickaf danlly+
ỽechedic dỽyll honno ny beidaỽd nep o|r kymry
ymdiret yr ffreinc. Ac yna y bu uarỽ cadell ap
grufud drỽy ỽrthrỽm gleuyt. ac y cladỽyt yn ystrat
flur ỽedy kymryt abit y creuyd ymdanaỽ. Ac