NLW MS. Peniarth 32 (Y Llyfr Teg) – page 182
Llyfr Iorwerth
182
a|r traean o ran y brenhin. Y brenhin a|dyly o
bop anreith o|r|wlat; y traean. a|r eur a|r aryant
a|r sỽỻt. a|r kyrn buelyn. a|r mein gwyrthuaỽr.
a|r|gỽiscoed y bo urlys ỽrthunt Oob* peth o|r a
gaffo priodaỽr yn|y tir ygkud; dyeithyr eur
ac aryant ef e|hun bieiuyd. kanys y brenhin
bieiuyd yr eur a|r aryant. Pỽy bynnac. a
gaffo naỽd gỽedy gỽnel brat arglỽyd. a myn+
nu o·honaỽ ymdiuỽyn mal y dywetto kyfreith. y
hỽnnỽ y barn kyfreith. coỻi tref y dat; kyt dihango
y eneit herwyd y naỽd a|gafas. O|deruyd. bot creir
ar|dyn. ac arueu yn|y laỽ. a|cheissaỽ o·honaỽ
aruot ac ỽynt; ny dyly y greir. Os y greir
a dewis ynteu; gỽahaner y arueu ac ef. a chat+
twer yn ỻe ny choỻont. Pỽy bynnac a vynno
na diwycco y gyflauan a|wnelher a|e arueu;
dodet ỽynt yn ỻe kyhoedaỽc. a dodet arnunt
naỽd duỽ a naỽd yr arglỽyd. ac ony|s dyt;
diwyget. O deruyd. y dyn gỽneuthur cam kyhoe+
daỽc. ac odyna keissaỽ y wadu yr diuỽynaỽ
y dadleu; ny|s gat kyfreith. idaỽ na thrỽy wat na
thrỽy dyston. kanys mỽy yỽ tystolyaeth y
kyhoed no|r kyfrif. O deruyd. bot deu·dyn yn kerdet
trỽy goet. ac ysgeinaỽ gỽrysgen y gan y
blaenhaf ar lygat yr olaf ac na|s ry·budyo; ta+
ler idaỽ y lygat os kyỻ. ac os|rybudya; ny|s tal.
| « p 181 | p 183 » |