NLW MS. Peniarth 32 (Y Llyfr Teg) – page 184
Llyfr Iorwerth
184
Sef yỽ ỻetuegin; vn a|dofher o wydlỽdyn mal
belen. neu lỽynaỽc. neu y gyfryỽ hỽnnỽ.
G Wedy dỽyn coron lundein a|e theyrnwia+
len y gan genedyl gymry ac eu dehol o
loegyr. y gosodassant dadleu y edrych pỽy a
vei vrenhin pennaf o·nadunt. Sef ỻe y gosso+
dassant. ar draeth maelgỽn yn aber dyui. ac
yno y doethant gỽyr gỽyned a|gỽyr powys. a
gỽyr deheubarth. a rieinỽc. a morgannỽc. a sei+
syỻỽc. ac yna y dodes maelda. hynaf mab un
hỽch vnachen pendeuic moel esgityaỽn ym|mei+
ryonhyd. kadeir winithedic o adaned y·dan
vaelgỽn. a phan|doeth y ỻanỽ; ny aỻaỽd neb
y arhos namyn maelgỽn e|hun. o achaỽs
y gadeir. ac o achaỽs hynny y kafas ynteu
bot yn vrenhin pennaf. ac aberffraỽ yn ben
priflys idaỽ. a Jarỻ mathrafyl. a iarỻ dinefỽr.
a Jarỻ kaer loeỽ y·danaỽ ynteu. ac yn eir y
eir ynteu ar baỽp o·nadunt ỽy. ac yn|gyfreith
yr eidaỽ. ac nyt reit idaỽ ef kadỽ eu kyfreith
ỽy. ac o achaỽs maelda hynaf y kauas pen+
uard y breint. a|e bot yn hynaf kygheỻory+
aeth O deruyd y dyn gỽneuthur cam yn|y kym+
hỽt yd hanffo o·honaỽ. a|e daly yndaỽ; diwy+
get yn|y kymhỽt y kam a wnel O deruyd. gỽneuthur
cam o·honaỽ ynteu yn|y gymhỽt e|hun. a|e
| « p 183 | p 185 » |