NLW MS. Peniarth 32 (Y Llyfr Teg) – page 48
Llyfr Iorwerth
48
y ar y gỽely drannoeth; ny dyly kowyỻ o hynny
aỻan. namyn y vot yn|gyffredin y·rygthunt.
Ny dyly merch o|da y that. namyn kymeint a
hanner rann a gaffo y braỽt. ac ny dyly talu o
alanas namyn hanner a|dalho y braỽt. a hynny
dros y phlant. ac o·ny byd plant idi a|thygu o+
honei na bo vyth; ny dyly talu dim. ac o|r byd
plant. ac eu mynet yn oet kyfreithaỽl; talent
e|hun drostunt o hynny aỻan. Ny|dyly gỽreic
yn|y byt talu keinhaỽc paladyr na hen na ieu+
angk. O deruyd. y wreic dywedut na aỻo y|gỽr vot
genthi yr keissaỽ yscar ac ef. kyfreith. a|eirch y proui.
Sef mal y profir; tannu ỻenỻiein wenn newyd
olchi y·danunt. a mynet y|gỽr y vot genthi.
a phan del y|ewyỻys y oỻỽng ar y ỻenỻiein.
ac o dichaỽn hynny mal y gỽelher ar y ỻenỻiein
dogyn yỽ idaỽ. ac ny eiỻ hitheu yscar ac ef o|r
achaỽs hỽnnỽ. ac ony eiỻ ynteu hynny. hi a
eiỻ yscar ac ef. a mynet ymeith a|r eidi yn|gỽbyl.
O|r|dyweit morỽyn ar ỽr dỽyn treis arnei. a|r
gỽr yn gỽadu. rei a|dyweit na eiỻ ef y wadu o
hebrỽg hi y chỽyn yn|gyfreithaỽl. heb ostỽg y
diỻat is ỻaỽ y gỽerdyr ac yn|waetlet. a hynny
dan leuein a|diaspedein trỽy y kyuanhedeu
nessaf idi. a|thystu udunt a|dangos y threis+
saỽ. a|e yrru yn|gyfreithaỽl yn|y dadleu. a|e ỻaỽ
| « p 47 | p 49 » |