Breudwd Welsh Prose 1300-1425
Cymraeg

NLW MS. Peniarth 38 – page 35v

Llyfr Blegywryd

35v

ar y|phymet o|r dynyon nessaf idi nat oed ỽreic. hi
a|e|that a|e mam a|e braỽt a|e chỽaer. a|e dyfot hi
yn vorỽyn attaỽ ef. o|r oed aeduet hi o vronneu
a|chedor. a dyfot oetran teithi gỽreic idi. Os teỽi
a|ỽna ef yn gyntaf. a bot genthi yr eilỽeith. a chy+
scu gyt a hi hyt y|boreu. kyt a|s kaffei ef hi yn ỽr+
eic; ny|dichaỽn ef dỽyn dim o iaỽn morỽyn rocdi
Os yn|y lle mal y|gỽyppo ef hynny; y kychỽyn at
neithaỽrỽyr y dyỽedut hynny; ony ỽatta hi yn|y
erbyn ef. a|thystu hynny y|r gỽyr; ny|cheiff dim o
iaỽn T·ri llỽ a|dyry gỽreic y|ỽr. pan enllippyer
gyntaf; llỽ seith ỽraged. ar yr eil enllip; llỽ pedeir
gỽraged ar dec. ar y trydyd enllip; llỽ deg|ỽraged
a|deu ugeint. o|r byd neb ryỽ hyspysrỽyd ar yr en+
llip. O|r byd rodyeit ar ỽreic y|ỽr. bit y gỽr dan
y gỽadaỽl hyt ympen y seith mlyned. ac o cheiff
hi teir nos o|r seithuet vlỽydyn; hanher y da oll
a|geiff y|ỽreic pan yscarhont. val hyn y rennir
y da; y|r gỽr y|moch. ac y|r ỽreic y defeit. Odyna y