NLW MS. Peniarth 45 – page 197
Brut y Brenhinoedd
197
A hynny yn anedic gantaỽ. Ac gỽedy y
hardhau o urenhinaỽl arỽydon y teyrnas
ymrodi a|wnaeth y haelder hyt nat oed
haỽd idaỽ caffel o da kymeint ac oed reit
idaỽ y rodi yr saỽl uarchogyon a|lithrei
ataỽ. Ac eissoes. Pỽy|bynhac a|uo gan+
taỽ haelder ananaỽl y gyt a phrouedic
uolyant. kyt boet eisseu arnaỽ ar talym
ny at duỽ wastat yghenoctit y argywe+
du idaỽ. Ac ỽrth hynny Sef a oruc arthur
can oed yndaỽ molyant yn ketymdeith+
ocau haelder. lluneithu ryuel ar saesson
hyt pan uei oc eu da hỽy y gallei ef gy+
uoethogi y uarchogyon a|e teulu. a|ia+
ỽnder a|dygei hynny idaỽ. Canys ef a|dy+
lyei holl. ynys. prydein. o wirtreftadaỽl dylyet
a chynullaỽ a|wnaeth holl ieuegtit. ynys. prydein.
A mynet parth a chaer efraỽc. A phan
gigleu Colgrim hynny. kynullaỽ a|or+
uc ynteu y gyt ac ef. y saesson. Ar ysco+
tyeit ar fichtyeit a|dyuot yn erbyn ar+
thur hyt yg glan dulas. Ac yno y perig+
lỽys y deu lu yn uaỽr. Ac eissoes y uudu+
golaeth a gauas arthur a chymhell colgrim
ar fo hyt yg caer efraỽc. A gwarchae y
| « p 196 | p 198 » |