NLW MS. Peniarth 46 – page 154
Brut y Brenhinoedd
154
o ỽlat arall Eissoes yd oed laỽer ynteu
onadunt oed|ỽell gantunt eu marỽ yn|y
gỽlat e|hun. no mynet y|ỽlat arall gann
adaỽ eu|ryeni a|r|ỽlat y|magyssit yndi.
Ereill a deỽissei gadỽ eu diỽreidaỽ ỽrth duỽ
gann o·def ychenoctit ymblaen mynet
y|ỽlat arall. y gymryt esmỽythter. a
chỽennych knaỽt. a|phann yttoed y|llyg+
es yn baraỽt. dodi a|ỽnaethpỽyt hyn ̷+
ny o ỽraged yndunt. a|hỽylaỽ ar hyt
temys ac ỽynt. ac ual yd oedynt yn gy+
uassgos y|traeth llydaỽ. nachaf ỽynt
kethraỽl gỽrthỽyneb udunt. ac yn|y
gỽasgaru. ac uelly bodi y|rann uỽyha
onadunt. ac ereill a|uyrryỽyt y|ynys+
sed agkyfuyeith ymplith|estronyon ge ̷+
nedloed. ac ereill o·nadunt a|gyuaruu
a|llyges a anuonassei Gracian amheradyr
rufein. hyt yn germania y|ryuelu ar yr ar+
uordir. yn erbyn y|neb a|ỽedassei y|uax ̷+
en. Sef gỽyr oed tyỽyssogyon arnunt.
| « p 153 | p 155 » |