Cardiff MS. 3.242 (Hafod 16) – page 18
Llythyr Aristotlys at Alecsander: Pryd a Gwedd Dynion
18
a ffynnyant a haelder. O|r|bydant vyrryon. arỽyd anos+
parth yỽ ac anghyfundeb. Palfeu hiryon a|byssed hiry+
on arnunt. a|arỽydocaa. kywreindeb a|cheluydodeu dỽylaỽ
ac yn gymen o|weithredoed ac yn da y|lywodraeth. O|r
byd byssed byrvras; arỽyd yỽ y|vot yn fol ac yn anghy+
men. Traet maỽr kigaỽc; a|dengys ynuytrỽyd a|cha+
ru sarhaedeu. Traet bychein teneu; arỽyd kaledi yỽ.
O|r|byd mein y|esgeired; arỽyd anwybot idaỽ. O|r byd+
ant bras; arỽyd gleỽder a chedernyt corff yỽ. Glinyeu
kigaỽc. arỽyd gỽander a medalrỽyd yỽ. Camre ỻydan
hỽyr; arỽyd llinerỽyd gỽeithredoed. Cameu bychein
man; arỽyd yỽ y vot yn|deruysgus ac yn|dybyus ac
yn aỻuawc y weithredoed. Cameu kyuartal; arỽyd
da ym|pob peth y|gof a|chỽmpassyat y natur. Pỽy byn+
nac y bo idaỽ knaỽt medal|ỻeith kyuartal y·rỽng ga+
rỽder a ỻyfynder. na bo na ry vyrr na ry hir ac yn
trossi ar|gochder yn|y rudyeu a golỽc araf a gỽaỻt
llyfyn kyuartal. a|ỻygeit kanolic crynyon. a|phenn
kymhedraỽl. a mynỽgyl kyuartal da y|lun. a|e ysgỽyd+
eu yn|drychafel ychydic. clunyeu ac esgeired heb
ormod o gic arnunt. ac ymadraỽd gloeỽ eglur. kyf+
artal o vraster a meinder. dỽylaỽ hiryon digaỽn a bys+
sed hiryon manol. ac ychydic o|chỽerthinat a chellỽ ̷+
eir a|dychymyc symyl. a|golygon ỻaỽen goreu dyn
herwyd natur ac anyan yỽ hỽnnỽ. Eissyoes nyt reit
ytt varnu ar vn o|r|arỽydon namyn ar|gỽbyl. Ac o|r
gỽely amryỽ arỽydon yn amryual. trỽssa|di ar|y|rann
| « p 17 | p 19 » |