Oxford Jesus College MS. 57 – page 171
Llyfr Blegywryd
171
Rac yr hualaỽc tri|mis. ac nat yssont eu perch+
yỻ. ac os yssant. atueret traean y gỽerth. ac
ny dyly hỽnnỽ eturyt y moch. a|bit dros y di+
lysrỽyd vyth O|r ỻad moch neb dyn. talet per+
chen y moch alanas y|dyn ot ymadef o|r moch.
Dros uaed kenuein. y telir baed a|hỽch o pob
parth idaỽ. Gỽerth cath a|lader neu a dycker
ledrat. y phenn a ossodir y waeret ar laỽr gỽ+
astat. a|e ỻosgỽrn y vyny. a|e daly ueỻy tra vy+
ryer graỽn gỽenith ymdanei yny gudyo bla+
en y ỻosgỽrn. a hynny vyd gỽerth cath. O+
ny cheffir y graỽn. dauat vlith a|e hoen a|e gỽ+
lan a|dal. os cath a|warchattỽo yscubaỽr y bren+
hin vyd. Gỽerth cath araỻ. pedeir keinyaỽc. kyfreith.
yỽ. Teithi cath a|phob ỻỽdyn ar|nyt ymbortho
dynyon ar eu|ỻaeth. traean y gỽerth yỽ. neu
werth y torỻỽyth. Y neb a|wertho cath bit
drosti na|bo catheric ar bop ỻoer. ac nat ysso y
chynaỽon. a|bot idi glusteu. a|ỻygeit. a|danned.
ac ewined. a|ỻad ỻygot yn|da.
| « p 170 | p 172 » |