Oxford Jesus College MS. 57 – page 62
Llyfr Blegywryd
62
ar seith aỻaỽr kyssegredic. neu seith·weith
ar vn aỻaỽr. Os y talaỽdyr a watta y mach.
gỽadet ar y seithuet o|r dynyon nessaf y werth.
Os mach a watta rann o|e uechni. ac adef
rann araỻ e|hun vn weith a|e tỽng. Pỽy|byn+
nac a vo mach goruodaỽc dros araỻ. ny ryd+
heir hyt ym|penn un dyd a blỽydyn. ac ny
phoenir o vyỽn hynny dros y cam a|wnel
hỽnnỽ. kanys rỽymedic myỽn yr achaỽs
yỽ. yny wyper a|del y kylus ỽrth gyfreith
ae na|del kynn teruynu Pỽy bynnac a
gymero mach ar dylyet. a marỽ y mach
kynn talu y dylyet. deuet ar ued y mach
a thynget ar y seithuet o|r dynyon nessaf
y werth ry vot hỽnnỽ yn uach idaỽ ar y
dylyet o|r keiff y bed. ac o·ny|s|keiff ar aỻaỽr
gyssegredic. a gỽedy hynny yr arglỽyd
bieu kymeỻ y vechni dros y marỽ. Os y kyn+
nogyn a vyd marỽ. a|r mach yn vyỽ. dyget
y mach y vechni yn|gyffelyb y hynny gan
| « p 61 | p 63 » |