NLW MS. Peniarth 11 – page 67v

Pan|gigleu ynteu hynny ef a oỻyngaỽd y vorwyn y|r ỻaỽr. ac

a|ymchoelaỽd att bỽrt. kanys aruaỽc oed o|bop arueu namyn

o waew. a|thynnu y gledyf a|oruc. a|gostỽng y daryan o|e vlaen.

a bỽrt yna a|e trewis a gỽaeỽ yny hyỻ y daryan a|r ỻuric. ac

yny syrth ynteu y|r|ỻaỽr yn|y lewic. Ac yna bỽrt a|doeth att yr

vnbennes ac a|dywaỽt. mi a debygaf heb ef daruot dy rydhau

di y gan y marchaỽc racko. ac beth a vynny di ymi y wneuthur

mỽy. Arglỽyd heb hi canys gorugost di vy amdiffyn i hynn

anuon vi hyt y ỻe y|m duc i y marchaỽc o·honaỽ. Yna ef a

gymerth march y gỽr bỽryedic. ac a|dodes y vorỽyn y vorỽyn

arnaỽ. ac a|e duc hyt y ỻe yd erchis. Ac yna hi a|dywaỽt ỽrth

bỽrt. arglỽyd heb hi. gỽeỻ vu dy wassanaeth di noc y tebygy. ka+

nys pei|dygassit treis arnaf|i. ef a|goỻassit mỽy no phump cant

o eneidyeu yn|gynt noc yd iecheit ỽynt. Ac yna bỽrt a|ovynnaỽd

pa vn oed y marchaỽc. Yn|ỻe gỽir heb hi. keuynderỽ ym oed. ac

ny ỽn i pa|ryỽ brofedigaeth kythreul a|beris idaỽ ef vyn|dwyn i

ual hynn y|m gỽaradwydaỽ. A|phan yttoedynt ỽy yn ymdidan

ueỻy nachaf mỽy no deudec marchaỽc urdaỽl gỽedy eu bot

yn keissyaỽ y vorỽyn. Ac yna hitheu a adolygaỽd y|r marcho+

gyon vot yn ỻawen ỽrth vỽrt. ac ỽynteu a|wnaethant idaỽ y

ỻewenyd mỽyhaf ac aỻyssant. ac a|geissyassant ganthaỽ tri+

gyaỽ y·gyt ac ỽynt. ac ynteu yna a|dywaỽt arglỽydi heb ˄ef nyt

oes fford ym y drigiaỽ. kanys nyt oes yn vyỽ onyt duỽ a|wy+

po vyng|coỻet am drigyaỽ yn|gyhyt ac y trigyeis. A phan

glywssant ỽynteu hynny. nyt ymbilyassant ac ef mỽy. ac y+

na yr vnbennes a|adolygaỽd idaỽ dyuot y ymwelet a hi pan