NLW MS. Peniarth 18 – page 69r
Brut y Tywysogion
69r
gỽyl seint ynys yd ymhoelaỽd rys ỽyndaỽt.
A|chynan ap maredud yỽ gỽlat o|lys y|brenhin.
Y ulỽydyn honno yg|kylch dechreu y|kanhayaf
yd anuones y|brenhin rann vaỽr o|e lu y|von y|los+
ki llaỽer o|r ỽlat ac y|dỽyn llaỽer o|e hydeu. A
gỽedy hynny y|doeth llywelyn at y|brenhin y|rudlann
ac y|hedychaỽd ac ef. Ac yna y|gỽahodes y|bren+
hin ef y nadolyc y|lundein ac ef a|aeth yno. Ac
yno y rodes y|ỽrogaeth yr brenhin. A|gỽedy y|trigy+
aỽ petheỽnos yn llundein yd ymhoelaỽd y|gymry.
Ac yg|kylch gỽyl andras y|gellygỽyt yỽein goch
ac yỽein ap grufud ap gỽenỽynỽyn o|garchar llywelyn drỽy
orchymyn y|brenhin. Ac yna y|cauas yỽein goch
a gan y|vraỽt lyỽelyn o|e gỽbyl uod cantref lleyn.
Y ulỽydyn racỽynep gỽyl edỽard vrenhin y rodes
edỽard vrenhin ac edmỽnt y uraỽt elianor y
kefnitherỽ merch symỽnt mỽnford y lywelyn
| « p 68v |