NLW MS. Peniarth 36A – page 58r
Llyfr Blegywryd
58r
o vreint tir. neu o vreint sỽyd. Teir
fford y gellir gỽrthot braỽdỽr teilỽg.
vn yỽ oe vot yn aghyffredin yn| y da*
dadyl rỽg y kynhenusson yn| y llys kyn
y varn. Eil yỽ y vot yn gyfrannaỽc
ar yr hyn y bo y dadyl o·honaỽ pei gellit
y ennill trỽy varn. Trydyd yỽ kymryt
gobyr am y dadyl ar ny bo gossodedic
y vraỽdỽr y myỽn kyfreith. Ny ellir
kymell dyn eglỽyssic y ỽrtheb y neb o
vaes y sened or kameu a dywetter ar ̷+
naỽ. Os gỽr eglỽyssic a gynheil tir trỽy
dylyet dan y brenhin. y perthyno gỽn ̷+
euthur gỽassanaeth yr brenhin o·ho ̷+
naỽ. ef a dyly gỽrtheb yn llys y brenhin
or tir ae perthyneu. kanys brenhin bieu
tir y teyrnas oll. ac ony ỽrtheb or tir
yn vfyd; y brenhin bieiuyd. kyt gallo
gỽr eglỽyssic vot y myỽn barn o vreint
tir gyt a lleygyon hyny vo amser y dat+
ganu. ny digaỽn datganu barn trỽy
gyfreith rỽg kynhenusson. kanyt oes
| « p 57v | p 58v » |