NLW MS. Peniarth 45 – page 257
Brut y Brenhinoedd
257
parth y bryttanneit ac arthur y llas. Edbrict. urenin.
llychlyn. Ac achel urenin. denmarc. A chadỽr
llemenic. A chaswallaỽn. a llawer o uilyoed
y gyt ac wynt. Ac y gyt a hynny yr ardyr+
chaỽc urenin. arthur a urathỽyt yn angheuaỽl
ac a ducpuỽyt y ynys auallach y iachau y
welioed. Ac ny dyweit y llyuyr ymdanaỽ
a uo hyspyssach no hynny. Coron teyrnas
ynys prydein a gymynỽys ef y Custennin
mab. cadỽr y gar e|hun. Ac sef amser oed hỽn+
nỽ. Dỽy ulyned a deugeint a phum cant
gwedy geni mab duỽ O|r arglỽydes ueir
wyry y gỽr a prynỽys y cristonogyon da
AC gỽedy gỽneuthur [ yr creu y callon.
Custennin yn urenin. y kyuodes y saesson
a|deu uab uedraỽt y daly yn|y erbyn. Ac ny
dygrynoes udunt. Ar neill o ueibon med+
raỽt a|ladaỽd Custenin yn llundein. Ar llall
a|ladaỽd yg caer wynt. Ar amser hỽnnỽ yd
aeth deinyoel sant o|r byt hỽn ac yn|yr un
amser yd aeth dewi archesgob caer llion
ar wysc y orffowys o|r byt hỽn. Ac ym my+
nyỽ y myỽn manachloc a seilỽys e|hun y+
n|y uywyt y cladỽyt. Canys padric a|dar+
oganassei idaỽ ef y lle hỽnnỽ kyn y eni. ~
| « p 256 | p 258 » |