Cardiff MS. 1.363 (Hafod 2) – page 140v
Brut y Brenhinoedd
140v
holl lw enys prydeyn a orchymynnwyt y lew
ỽap kynuarch wrth keyssyaỽ gỽrthlad
a gwrthwynebỽ yr gelynyon. Ar llew
hỽnnỽ yarll kaer llyr oed e marchaỽc
gwychraf a dewrhaf a chlotỽoraf a do+
ethaf. ac adỽet o|y oet. Ac o achaỽs e mo+
lyanheỽ ar deỽodeỽ da hynny en|y klot+
ỽory e brenyn a rodassey anna y ỽerch y+
daỽ a llywodraeth e teyrnas hyt tra ed
oed e brenyn en gorwed en|y kleỽyt. Ar
gwr hỽnnỽ gwedy mynet o·honaỽ a dech+
reỽ ymlad ar gelynyon en ỽynnych y kyly+
ey racdỽnt megys e bey reyt ydaỽ kyrchỽ
e dynassoed kadarn racdvnt. Gweythyeỽ
ereyll e bydey bỽdỽgavl enteỽ ac y gwas+
karey gweythyew yr koedyd ac yr myn+
yded. ac yr kerryc. gweythyew y kymh+
elley y ew llogheỽ en waradwydvs. ac eỽ+
elly hyr pedrỽsder ymlad a wu er rydỽ+
nt megys na alley nep gwybot pa dyw
onadỽnt y dygwydey e bvdỽgolyaeth. ka+
nys syberwyt e brytanyeyt oed en|eỽ har+
kywedỽ wrth nat oed teylwng kanthỽ+
nt bot wrth kyghor er yarll en ev llywyaỽ.
| « p 140r | p 141r » |