Oxford Jesus College MS. 119 (The Book of the Anchorite of Llanddewi Brefi) – page 137v
Gwlad Ieuan Fendigaid
137v
*llyma dechreu ystorya gỽlat. Jeuan vendigeit.
Llyma lyuyr a|anuones brenhin yr yndia y
amherawdyr constantinobyl. yn|yr hỽnn y
dyellir llaỽer o amryuaelon betheu odidaỽc
Ac yndaỽ y|mae petheu neỽyd. a|phetheu ny
chlyỽyspỽyt yn llyureu ereill eiroet ac ny che+
ffir. a|llyma grym y|llyuyr hỽnnỽ.
Jeuan offeirat o gyuoeth a nerth duỽ yn ar+
glỽyd ni iessu grist. brenhin y|dayraỽl vrenhined
Ac arglỽyd yr arglỽydi. yr gỽr yssyd yn lle duỽ
nyt amgen y lyỽaỽdyr rufein. ysyd yn anuon
annerch. a llyỽenyd o rat prydest. a|thrỽy|hynny
gann ysgynnv ar|betheu a|uont vch. Ef a|ve+
negit vrth yn maỽrỽrdaeth ni y carut ti yn
arderchogrỽyd ni ar amled yn goruchelder ni.
a ni a adnabuam drỽy yn negesỽas ni y|myn+
nut ti auon yn ni petheu bryỽys a rei digryf.
Ac val yd ỽyf dyn i. da yỽ gennyf hynny. ac
o|r petheu einym nynhev gann yn negesỽas ni
nyheu a anuonỽn petheu ereill y|titheu. Ac ni
a|uynnỽn. ac a|damunỽn ỽybot a|oes gennyt
ti ffyd yaỽn ygyt a|ni. ac a|gredy yn hollaỽl yn
harglỽyd ni iessu grist. Pann adnappo y|rei ein+
ym ni yn bot ni yn dynyon. y|tebic dy roegỽyr
ditheu dy|uot ti yn|duỽ. eissoes kann adỽaenam
The text Gwlad Ieuan Fendigaid starts on line 1.
| « p 137r | p 138r » |