NLW MS. Llanstephan 27 (The Red Book of Talgarth) – page 88v

y rei a vu kynnoc ỽynt bodlaỽn uu duỽ udunt. Y mae

heb ef meir e|hun yn gỽneuthur creuyd newyd. nyt amgen

noc ymrodi y duỽ yn wyry tra vo byỽ. ef a|welit yni heb

ef bot yn iaỽn astudyaỽ ohonam y·gyt trỽy nerth duỽ

y geissyaỽ atteb y ganthaỽ att bỽy y roder meir o|e chadỽ

a|r ymadraỽd hỽnnỽ a rangaỽd bod y baỽp. a bỽrỽ coelbrenn

ar hoỻ lỽyth yr israel. ac erchi y baỽp o|r a uei heb wreic ida+

ỽ. dyuot trannoeth y|r demyl. a gỽialen yn ỻaỽ bop un oho+

nunt. ac ueỻy y gỽnaethpỽyt. a Joseph oed hynaf o|r rei a

oed heb wraged udunt yn|y demyl. a gỽedy rodi eu gỽial yn

ỻaỽ yr hynaf o|r demyl. ynteu a|rodes y wialen yn aberth

y duỽ. ac a|erchis y|r arglỽyd gyngor. ac yna y kafas atteb

y gan duỽ. Dyro heb ef y gỽial oỻ yn|y cor. a|gat yno hyt

auory. a doet baỽp o·honunt a·vory y gyrchu eu gỽial. ac o

vlaen un o|r gỽial yr ehetta colomen y|r nef. ac att berchen

y wialen honno roder meir o|e|chadỽ. ac ar hynny y trigyỽyt.

ac yn uoreaỽl drannoeth y doeth paỽp y|r demyl. a gỽedy gỽne+

uthur yr offrymmeu yd aeth yr esgob y|r cor. ac ef a rodes

y wialen yn|ỻaỽ bop vn. ac nyt aeth colomen o vlaen vn

wialen o·nadunt. Ac yna y gỽisgaỽd abizacar escobwisc ym+

danaỽ. ac yr aethant ygyt hyneif y demyl. ac y|dy·vynnaỽd

paỽp yr aberth. ac yd aeth ef yng|gỽedi. ac yna yr ymdan+

gosses angel o|r nef idaỽ. ac y dywaỽt ỽrthaỽ. Y|mae yma

y wialen uerraf o·nadunt. heb gyfrif o·honat. ac ny|s dugost

gyt a|r ỻeiỻ. a phan rodych honno yn ỻaỽ y pherchen ef a

ymdengys yr arwyd ytt. ac yna yd oed wialen Joseph kann

oed hen wedy|r vỽrỽ ymeith. ac ynteu ny|s go·vynnaỽd hi. a