NLW MS. 3035 (Mostyn 116) – page 116r
Brut y Brenhinoedd
116r
Ac ỽrth hyny haỽs y gaỻỽn ninheu diodef ryfel gỽyr
rufein os o| gyffredin gyfundeb a chyt·gygor yn doeth
y racuedylyỽn py wed y gaỻỽm ni gỽahanu ac eu ry+
fel ỽynt A| r rẏfel hỽnỽ herwyd y tybygaf|i nyt maỽr
reit in y ofynhau. kanys andylyed·us y| maent ỽy yn
erchi teyrnget o| ynys prydein. kanys ef a dyweit dylyu
y| talu idaỽ ỽrth y talu y vlkessar ac y ereiỻ gỽedy eff
A| hynẏ o achaỽs teruysc ac anundeb yrỽg an hendadeu
ninheu A| dugasant wyr rufein y| r ynys hon ac odreis ̷
y gỽnaethant yn trethaỽl. Ac ỽrth hẏnẏ py beth bynac
a gaffer a| thỽyỻ a chedernhit. nyt o dylyet y| kynhelir
hỽnỽ. Pỽy bynac a| dycco treis. peth andylyedus a geis
y| gynal. A chanys andylyedus y| maent ỽy yn keissaỽ
teyrnget y genhym ni; yn gynhebic y hyny ninheu a| deis+
syfỽn teyrnget y|gantunt ỽy o| rufein A| r kadarnaf o·ho+
nom|ni kymeret y gan y| ỻaỻ. kanys o| gỽeresgynỽys vlkes+
sar ac amherodron ereiỻ gỽedy ef ynys prydein. Ac o achaỽs
hynẏ yr aỽr hon holi teyrnget ohenei. Yn gynhebic y hyny
minheu a varnaf dylyu o rufein dalu teyrnget y| min+
heu. kanys vy ryeni inheu gynt a weryscynassant rufein
Ac a| e kynhalasant nyt amgen. beli vab dyfynwal gan
ganhorthỽy bran y vraỽt. duc bỽrgỽyn. gỽedy crogi
petwar gỽystyl ar hugein o| dylyedogyon rufein rac bron
y gaer Ac a| e dalyassant trỽy ỻawer o amseroed A gỽedy
hynẏ custenhin mab elen A maxen vab ỻywelyn pop vn
o| r rei hẏnẏ yn gar agos imi o gerenhyd Ac yn vrenhined
arderchaỽc o goron ynys. prydein. Yr vn gỽedy y| gilyd a| gaỽs+
sant amherodraeth rufein Ac ỽrth hyny bo ny bernỽch
chwi bot yn iaỽn i|minheu deissyfeit teyrnget o| rufein
O| ffreinc ac o| r ynyssoed ereiỻ ny ỽrthebỽn ni vdunt ỽy.
| « p 115v | p 116v » |