Breudwd Welsh Prose 1300-1425
Cymraeg

NLW MS. 3035 (Mostyn 116) – page 177v

Brut y Tywysogion

177v

y ỽyr e|hun. Ac y ỻas kadỽgaỽn ap Maredud y gan waỻter
ap ridit. ac yna y kymerth rys ap gruffud y cantref maỽr
a|chasteỻ dinefỽr. Y vlỽydẏn hono y bu varỽ kediuor ap da+
niel archdiagon keredigyaỽn. ac yna y bu varỽ henri ap
arthen goruchel athro ar gyffredin yr hoỻ yscolheigon
Y vlỽẏdẏn rac·ỽyneb gỽedy gỽelet o rys ap gruffud nat
yttoed y brenhin yn kywiraỽ ỽrthaỽ dim o|r a adaỽssei
ac na aỻei ynteu vuduchocau* yn ad·vỽyn. kyrchu a|wnaeth
yn ỽraỽl am ben kyfoeth rosser jarỻ clar y gỽr y ỻadyssit
einaỽn ap ynaraỽt y|nei o|e achaỽs a|thorri casteỻ aber rei+
daỽl a|chasteỻ mabwynẏaỽn a|e ỻosgi ac atweresgẏn hoỻ
geredigyaỽn a mynychu ỻaduaeu a|ỻoscuaeu. ar y|flemhis+
seit a|dỽẏn mynych anreitheu ẏ gantunt a gỽedy hẏnẏ
yd amaruoỻes yr hoỻ gẏmrẏ ar ymỽrthlad a|cheiweit* y
freinc a hẏnẏ yn gyfun ygyt. Y vlỽẏdẏn rac·ỽyneb y diffei+
thaỽd dauid ap ywein gỽyned tegigyl. ac y|mudaỽd ẏ|dẏn+
ẏon a|e hanifeileit y·gyt ac ef hyt yn dyffryn clỽyt. a gỽedẏ
tybygu o|r brenhin y bydei ymlad ar y casteỻ a|oedẏnt yn
thegygyl kyffroi ỻu a|oruc drỽy diruaỽr vrẏs a|dyuot hyt
yn rudlan a|phebyỻu yno teir nos. a gỽedy hynẏ ymhoe+
lut y|loegẏr a|chynuỻaỽ diruaỽr lu ẏ·gẏt ac ef o dethole+
digẏon ymladwẏr ỻoegyr a|normandi a|flandrẏs ac angiỽ
a gỽassgỽyn a|hoỻ brydein. a dyuot hẏt y|groes oswaỻt gan
darparu aỻdudaỽ a diuetha ẏr hoỻ vrytanyeit. ac yn|ẏ
ebẏn* ynteu y doeth ywein gỽyned a chatwaladẏr veibon
gruffud ap kynan a hoỻ lu gỽyned gyt ac ỽynt a|r arglỽyd
rys ap gruffud a|hoỻ deheubarth gyt ac ef. ac ywein
kyfeilaỽc a joruerth goch ap maredud a meibon Madaỽc