NLW MS. 3036 (Mostyn 117) – page 125
Brut y Brenhinoedd
125
bryderach a* ttitheu. Ac ygyt a hynny heuyt vn
arch a archaf it bei na bei rac ofyn vy gomed o·ho ̷+
nei. Ac yna y dywaỽt gỽrtheyrn. Anuon ti heb ef
de genn·adeu hyt yn germania y|wahaỽd odyno
kymeint ac a uynhych. Ac odyna arch i minheu
A phy beth bynhac a erchych; ny|th necceir o·honaỽ.
Ac yna estỽg y pen a|wnaeth hengyst a diolỽch idaỽ
hynny. A dywedut ỽrthaỽ val hyn. tydi arglỽyd
heb ef am kyuoethogeist i. Ac a|rodeist im eisted+
uaeu amhyl ehalaeth o tir a dayar. Ac eissoes nyt
megys y|guedei enrydedu tywyssaỽc a|hanffei o
lin brenhined. Sef achaỽs yỽ. ti a dylyut rodi imi
ae kastell ae dinas ygyt ac a|rodut. megys y|m
guelit inheu yn enrydedus ym|plith y tywysso+
gyon. kanys teilygdaỽt iarll neu varỽn oed iaỽn
y rodi y|tywyssaỽc a anffei o lin tywyssogyon. Ac y+
na y dywaỽt gỽrtheyrn idaỽ ynteu yn atteb. A
ỽrda heb ef vyg wahard i a wnaethpỽyt rac rodi
y ryỽ rodyon hynny itti. kanys estraỽn
genedyl yỽch a|phaganyeit. Ac nat atwen inheu
etwa aỽch moes chwi nac aỽch deuaỽt megys
y gallỽyf aỽch keffelybu y|m kiỽtaỽtwyr. kanys
pei dechreuỽn i aỽch enrydedu chwi megys pri+
aỽt giỽdaỽt yr ynys. guyrda y teyrnas a gyuod+
ynt y|m herbyn ac a ỽrthỽynebynt im. Ac yna
y dywaỽt hengyst. Arglỽyd heb ef canhata dith+
eu y|th was guneuthur kymeint ac a gyrhaedho
| « p 124 | p 126 » |