NLW MS. 3036 (Mostyn 117) – page 36
Brut y Brenhinoedd
36
1
teu lyr y rodei y verch idaỽ ef heb argyfreu a heb da
2
genti yn llawen. kan daroed idaỽ rodi y| gyuoeth a|e
3
eur a|e aryant y|r dỽy uerchet ereill. A guedy mene+
4
gi hynny y aganipus. o garyat y uorỽyn ef a an+
5
uones y| gennadeu eilweith trachefyn. A dywed+
6
ut bot idaỽ digaỽn o eur ac aryant a chyfoeth. Ac
7
nat oed reit idaỽ ef ỽrth dim namyn kaffel gure+
8
ic vonhedic telediỽ dylyedaỽc y kaffei etiued o·ho+
9
nei a gynhalei y kyuoeth guedy ef. kanys ef bioed
10
y| tryded ran o freinc. Ac yn diannot cordeila a| ro ̷+
11
det y aganipus.
12
AC ym pen yspeit yg kylch diwed oes lyr y| gue+
13
rescynnỽys y deu daỽ arnaỽ y gyfoeth a| gyn ̷+
14
halassei ef yn ỽraỽl trỽy hir amser. Ac a|e ranass ̷+
15
ant y·rydunt yn deu hanher. Ac o gymotloned eis ̷+
16
soes. maglaỽn tywyssaỽc yr alban a gymyrth llyr
17
attaỽ ar y deugeinuet marchaỽc. rac y bot yn ge ̷+
18
wilyd gantaỽ uot heb varchogyon ỽrth y oscord.
19
A guedy bot llyr uelly gyt a maglaỽn yspeit dỽy
20
vlyned; llityaỽ a oruc Goronila y verch ỽrthaỽ rac
21
meint a oed o varchogyon ygyt ac ef. A rac eu gua+
22
ssanaethwyr yn teruyscu y llys. A dywedut a wna+
23
eth ỽrth y gỽr bot yn digaỽn vgeint marchaỽc y
24
gyt a|e that. Ac ellỽg y rei ereill y ymdeith. A gue ̷+
25
dy dywetut hynny ỽrth lyr. llidyaỽ a oruc. Ac ym+
26
adaỽ a maglaỽn. A mynet hyt ar henwyn tywys+
27
saỽc kernyỽ y|daỽ y llall. A|e erbynyeit o hỽnnỽ ef
| « p 35 | p 37 » |