Breudwd Welsh Prose 1300-1425
Cymraeg

NLW MS. Peniarth 18 – page 44v

Brut y Tywysogion

44v

dodi oll ymedyant sỽydogyon y|brenhin ar de+
yrnnas y rodi drostaỽ ef. Y|ulỽydyn honno y dare+
stygaỽd rodri ap yỽein ynys uon trỽy nerth
gỽrthrych vrenhin manaỽ. A chynn penn y ulỽy+
dyn y gỽrthladỽyt y|gann ueibon kynan ap 
yỽein. Y ulỽydyn honno nos nadolyc y|deuth teu+
lu maelgỽyn ap rys a|blifyeu gantunt y|torri
castell ystrat meuryc. Ac y|dryllassant y castell.
Y ulỽydyn honno y|cauas hyỽel seis ab yr arglỽ+
yd rys castell gỽis drỽy vrat. Ac y|delis phylib
ap gỽis keittỽat y|castell. A|e ỽreic. A|e deu vab.
A gỽedy gỽelet o|r dyỽededic hoỽel na|allei ef ca+
dỽ y kestyll oll hep uỽrỽ rei yr llaỽr ef a|gennada+
ỽd y|teulu ef ac y|teulu maelgỽyn  y|vra+
ỽt torri castell llannyhadein ae|distryỽ. A|phann
gigleu y|fflandrassyeit hynny ym·gynnullaỽ a
orugant yn|dirybud yn erbyn y|deu vroder a|e kyr+
chu. A|llad llaỽer o|e gỽyr a|e gyrru ỽyntev ar ffo.
Ac yn|y lle ỽedy hynny ymhoelut a|ỽnaeth y kym+
ry. Ac ym·gynnullaỽ yg|kyllch y|castell ac ỽrth y
heỽyllys y|distryỽ hyt y|llaỽr. Y|ulỽydyn honno
y|delis anaraỽt vadaỽc a|hoỽel y vrodyr. ac yd
ysbeilaỽd o|e llygeit ỽynt. Yn|y ulỽydyn honno y
rodes maelgỽn ap rys castell ystrat meuryc o|e
vraỽt. Ac y adeilaỽd yr arglỽyd rys yr eilỽeith ca+
stell rayadyr gỽy. Y|ulỽydyn honno y delit yr ar+