NLW MS. Peniarth 190 – page 128
Ystoria Lucidar
128
1
discipulus Pa oet. pa uessur. Magister Yn oet deng|mlỽyd ar|hu+
2
geint. na chynt no hynny na|gỽedy y buant
3
y veirỽ. discipulus Ef a|damchweina weitheu y vle+
4
id yssu dyn. a ry drossi kic y dyn yn|gic y|r ble+
5
id. ac yssu o arth y bleid. ac yssu o leỽ yr|arth.
6
pa|delỽ vyth y kyuodei y dyn o|r rei hynny. Magister.
7
Yr hỽnn a|vu yn gic y|r dyn a|gyvyt. ac a|berth+
8
yn ar y bỽystuil a|dric yn|y ỻaỽr. kanys ef a
9
wyr gỽahanu y neb a wybu wneuthur pob
10
peth o|dim. wrth hynny na bỽystuileit na
11
physgaỽt nac adar a|e hysso paỽb a|ffuryf+
12
heir yn|y gyuodedigaeth honno mal na cho+
13
ỻo vn blewyn o|e waỻt. discipulus A ymchoel y gỽaỻt
14
ynteu a|r ewined yn eu ỻe e|hun drachevyn.
15
neu a|vydant ỽy dybryt o hynny. Magister|Nyt oes
16
aỻu deaỻ a ymchoelant ỽy yn eu hen·ỻe
17
gynt. namyn megys crochenyd a dorro ỻes+
18
tyr newyd ganthaỽ. ac o|r vn prid hỽnnỽ a
19
wnel vn araỻ. heb ystyryaỽ pa le idaỽ a vu
20
glust pa le a vu waelaỽt. veỻy y ffuryfhaa
21
duỽ o|r vn defnyd corff anhebic iaỽn y|r ỻaỻ.
22
kanys peỻ y ỽrthaỽ vyd pob peth dybryt gỽann.
| « p 127 | p 129 » |