NLW MS. Peniarth 32 (Y Llyfr Teg) – page 11
Llyfr Iorwerth
11
eit mae hynn yỽ naỽd y distein. o|r pan dech+
reuho sefyỻ yn|y sỽyd; yny el y dyn diwethaf
y gysgu dỽyn y|dyn a|wnel y cam. Distein a
dyly yn wastat medu y bỽyt yn|y gegin. a|r
ỻynn yn|y vedgeỻ. Distein a|dyly gỽassanae+
thu ar chwe|dyn o vỽyt a ỻynn. ac ar y seith+
uet o lynn. Sef ynt y rei hynny y brenhin.
a|r heneuyd. a|r osp. a|r etlig. a|r penhebogyd
a|r troedaỽc. a|r pengỽastraỽt yn seithuet ar
lynn. kanys kyn·ny|dylyo ef kyt·vỽytta a|r
rei ereiỻ. ef a|dyly kyt·yfet ac ỽynt. Ef a dyly
gossot naỽd a thystu y gỽirodeu. a phỽy byn+
nac a torro y naỽd gyffredin a|ossotto ef; nyt
oes y hỽnnỽ vn naỽd. Ef a|dyly deu ebran o|e
varch. a phedeir pedol ac eu to o hoelon un+
weith bop blỽydyn y|gan y|gof ỻys. Ef a|dy+
ly hỽyedic y|gan y penhebogyd bop gỽyl vi+
hagel. Ef a|dyly y gan y kynydyon o hanner
chwefraỽr hyt y kysseuin dyd o vaỽrth. croen
ewic pan y mynho. ac o|r dyd hỽnnỽ hyt
hanner hydref croen hyd. kanys yn|y tym+
horeu hynny yd helir. Ef a dyly cadỽ rann
y brenhin. o anreith o|r|wlat. yny defnydyo y brenhin.
Pan defnydyo y brenhin y traean; y distein
a|geiff dewis eidyon. Distein bieu tygu dros
y brenhin. Distein a|dyly rannu aryant y gỽynos.
| « p 10 | p 12 » |